Shillong, Jymmang 08:
U Lamphang ka ïingdorbar thawaiñ ka jylla u Thomas A Sangma u la aiti da ka shithi kum ka jingithuh jong ka ïingdorbar ïa ka jingleit pynïasoh pura jong ki MLA ka PDF sha ka National People’s Party (NPP).
Lah ban pynkynmaw ba ha ka sngi Saitjaiñ, ki ar ngut ki MLA ka PDF, kita u Bah Gavin M Mylliem, MLA ka Sohra uba dei ruh u President ka PDF bad u Bah Banteidor Lyngdoh, MLA ka Mawkynrew uba dei ruh u Working President ki la pynïasoh pura sha ka NPP.
Ha kaba ïadei bad kane, u Lamphang ka ïingdorbar hadien ba la ithuh, u la aiti ruh ïa ka shithi ai jingithuh jong ka pynïasoh pura sha ka NPP.
Haba kren sha ki lad pathai khubor, u Bah Gavin M Mylliem u la ong ba ki la wan sha ka shlem treikam u Lamphang ban shim ïa ka shithi ai jingithuh da ka ïingdorbar ïa ka jingpynïasoh ki MLA ka PDF sha ka NPP, katkum ka shithi pyntip ba ki la phah sha u Lamphang ha ka 5 tarik Jymmang.
