Shillong, Jymmang 08:
Ka RoundGlass Punjab FC ka la soi ïa u rangïalehkai ka Jylla u Samuel Kynshi Lyngdoh bad u Lalnuntluanga na ka Real Kashmir na ka bynta ka jingïateh soskular kaba jlan bad katei ka klob ban ïoh ïashim bynta ha ka sien kaba nyngkong eh ha ka Indian Super League naduh ka aïom ka ban wan.
Ka RoundGlass Punjab FC ka dei ka klob kaba la khur ïa ka nam lahduh ha ka I-League 2022-23 bad ka la kiew sha katei ka kyrdan ïalehkai kaba hakhlieh duh jong ka ri hadien ba long ka klob kaba nyngkong eh na ka I-League.
Lyngba ka jinglah ban kamai 52 dor-thong (point) ha ka aïom ïalehkai, ka RoundGlass Punjab FC ka la lah ban tam ïa ka Sreenidi Deccan FC kaba la wan ha ka kyrdan ba-ar. Kum shi bynta ban pynkhreh ha kane ka lympung ïalehkai kaba heh duh ha ka ri, ka RoundGlass Punjab FC ka dang pynleit jingmut ban pynkhlaiñ ïa ka klob da kaba soi ïa kitei ki rangïalehkai ba kynsai na ka Real Kashmir.
U Samuel uba dang 23 snem ka rta, u la ïoh ban ïalehkai ha ka second division bad hadien kata u la kiew kyrdan sha ka first division hadien ba u lah ban pynpaw ïa ka jingtbit kum u rangïalehkai.
Katei ka jingïoh ban ïalehkai ha ka first division ka la long ka jingplie lad pat ïa u ba un ïoh ïalehkai sa ha ka lympung ïalehkai ba heh duh jong ka ri bad ban pynpaw ïa ka sap ïalehkai kaba u don.
Utei u rangïalehkai barim ka Shillong Lajong FC u la ïadon bynta ruh bad ka Kerala Blasters (reserves team) bad u la ïoh ïa ka nam kum u rangthep kol ba kynsai ha ka I-League ha ka por ba u dang ïalehkai na ka Shillong Lajong ha u 2017.
Utei u rangïalehkai shapdeng ka Jylla u la lah ban pynpaw ïa ka jingtbit na ka Real Kashmir ha ka second division ha kaba u la ïarap pynbuh bol san sien bad thep hynriew kol na ki 20 sien ïakhun. Dei lyngba kane ka jinglah ban pynpaw ïa ka jingtbit ba u la shah phaikhmat sha katei ka lahduh jong ka I-League (RoundGlass Punjab FC).
Ban bynrap lang ïa u Samuel, u paralok ba ïalehkai lang ha Kashmir, u Lalnuntluanga u la pynïasoh lang sha katei ka klob hadien ba u la mih noh na Kashmir. Une u rangïalehkai ba dang 23 snem ka rta na Mizoram, un pynkhreh ban ïasoh lang bad katei ka lahduh jong ka I-League hadien ba ka kontrak ka jong u ka la poi sha kaba kut.
Utei u rangïalehkai shapdeng u la long uba kynsai ha Real Kashmir naba u la ïarap pynbuh bol saw sien bad thep ar kol na ki 20 sien ïakhun na ka bynta katei ka klob.
Hashwa ba un ïasoh sha ka Real Kashmir, u la ïalehkai shwa na ka bynta ka Swaraj FC. Hadien u la ïadon bynta ruh ha ka Bengaluru FC bad ka FC Goa (reserves). U la pynïasoh sha ka RoundGlass Punjab FC hadien ba u la lah ban pynpaw ïa ka jingtbit ha ka kam ïalehkai.
