Madrid, Jymmang:
Ka khlur ialehkai Tennis na ka ri Belarus kaba shong ha ka kyrdan ba-ar ha ka lympung ialehkai ba mynta ka Madrid Open ka Aryna Sabalenka ka la lah ban pynliem noh ia ka nongiakhun pyrshah kaba bat ia ka kyrdan ba nyngkong ha ka pyrthei na ka ri Poland ka Iga Swiatek da 6-3, 3-6, 6-3 na ka bynta ka jing-iaknieh ban ioh rah ia ka trophy jingjop na katei ka lympung ialehkai ha ka kyrdan iakhun para marwei jong ki kynthei.
Katei ka jingjop ka jong ka, ka long ruh ka jingioh ha ka ban pynhiar-kput ia ka Iga ha kaba ka Aryna ka lah mad ia ka jingshah pynrem noh ha ka jingiakhun phainal ha u bnai ba lah dep ha Stuttgart.
Ha katei ka jingiakhun phainal hapdeng ki arngut ha ka Madrid Open, ka Sabalenka ka lah sei ia kata ka rukom ialehkai kaba paka ka jong ka na ka bynta ban lah pynliem ia ka Swiatek ha ka sien kaba nyngkongeh ha ka jingiakhun jong ki ha kum katei ka lympung ialehkai ha khyndew-saw, da kaba pynshisha ruh ialade ba kan long ka kyrtong kaba thikna na ka bynta ka jingiaknieh pat ia ka trophy jingjop na ka lympung ialehkai ka ban wan ka French Open.
Shuh shuh ha ka jingiakhun ki arngut, ka Sabalenka ka lah sei ia ki katto katne ki rukom ialehkai ki jong ka na ka bynta ban pynsaja ia ka nongiakhun pyrshah, da kaba pynkhein ruh arsien ia ki dor-thong jong ka Iga ha ka jingsam bol ka jong ka ha ka jingialehkai ba phra bad pynlong ia ka Aryna ban sar ia ka jingjop ha ka set iakhun kaba nyngkong.
Hynrei ka ha set iakhun kaba ar, ka Swiatek ka lah ioh ban pynphai ia ka jingiakhun ha kaba ka lah pynher ia ki dor-thong jingjop jong ka sha ka 3-0 ha shuwa ban shah pyniaryngkat dor-thong ha ka jingiakhun da 1-set All.
Katba ka jingiakhun ka dang khluid bha hapdeng ki arngut, ka Sabalenka ka lah nang iai pynher sted ia ka rukom ialehkai jong ka na ka bynta ban pynkhein noh ia ka jingsambol ka Swiatek ha shuwa ba kan pyndep ia ka jingialehkai baroh kawei da kaba khur shalade ia ka jingjop ha ki saw dor-thong ialehkai ki jong ka.
