Shillong, Jymmang 08:
U Secretary ka Meghalaya Athletic Association (MAA) u Bah Finely Pariat u la shah jied kum u manager jong ka kynhun ïalehkai ka ban leit ïashim bynta ha ka Asian U-20 Athletics Championship ka ban long ha South Korea naduh 4 haduh 7 tarik u Jylliew mynta u snem.
Kane ka long ka sien kaba nyngkong eh ba utei u General Secretary ka Meghalaya State Olympic Association (MSOA) ban ïoh ïa kum kane ka lad na ka bynta ban ïalam ïa katei ka kynhun ïalehkai ka ri, hadien ba u la shah jied ha ka Athletics Federation of India.
“Nga ai khublei ïa ka Athletics Federation of India kaba la plie lad ïa nga ba ngan shimti ïa ka kynhun ïalehkai ka ri ha ka jingleit ïashim bynta ha katei ka lympung,” la pynpaw u Bah Pariat.
“Nga sngew ban ainguh ïa U Blei uba la plie lad ïa nga ha ka por ka bym shym poi pyrkhat. Kane ka long ruh ka burom ïa nga bad ka Jylla hi baroh kawei ha kaba ka AFI ka la sdang ithuh ïa ngi kiba don ha ka jylla kaba rit.
