Lucknow,Jymmang:
U Ishan Kishan uba dei uwei na ki khlur ialehkai Kriket ka ri uba tbit ha ka liang ap-wiket bad kumjuh ha ka liang ban tied bol mynta ka sien u la shah jied kum u nongmih bujli ha ka jaka jong u KL Rahul uba dang don hapdeng ka jingmynsaw. Kane ka jingshah jied u Kishan ka long na ka bynta ka jing-iakhun phainal bad ka Australia ha ka World Test Championship, ka ban sa long naduh ka 7-11 tarik u Jylliew ha England.
Kum ban shu pynkynmaw hangne ka long ba u Rahul u lah ngat ha ka jingmynsaw ha ki bynta jong ka kjat jong u katba u dangap-bol ha ka lympung ialehkai IPL 2023 ha ka jingiakhun pyrshah hapdeng ka Lucknow Super Giants bad Royal Challengers Bangalore ha ka 1 tarik mynta u bnai.
Ka lah don ruh katto katne ka jingeh ba ka kynhun ialehkai ka ri ka lah mad nalor ka jingbym don u Rahul bad na ka liang jong ka BCCI ka lah pynrung ruh ia ka kyrteng jong ki lai ngut ki rangialehkai ba lah shu pynap-lypa kata u Ruturaj Gaikwad, Mukesh Kumar, Suryakumar Yadav naba ka jingkynthup ia ki lain gut ka long ka jingbym thikna ia ka jingshimbynta jong ki arngut ki rangkawang bol ka kynhun kata u Jaydev Unadkat bad Umesh Yadav; naba u Jaydev Unadkat u dang don hapdeng ka jingmynsaw ha ka tyrpeng jong u katba u Umesh Yadav u dang don hapoh ka jngshah sumar na ka jingsmynsaw ha ki kjat jong u katba u dang shimbynta ha ka jingialehkai ba 36 jong ka IPL 2023 hapdeng ka Royal Challengers Bangalore bad Kolkata Knight Riders (KKR).
Kumta ruh na ka liang jong ka All-India Senior Selection Committee ka bym shym la don shuh da kawei pat ka lad, ka lah jied ia ka kyrteng jong u Ishan Kishan kum uta u nongmih bujli ha ka jaka jong u KL Rahul.
Ka kynhun ialehkai Kriket ka ri ka ban ia aireng ha ka jingiakhun phainal ha ka WTC ka kynthup:
Rohit Sharma (Captain), Shubman Gill, Cheteshwar Pujara, Virat Kohli, Ajinkya Rahane, KS Bharat (wk), Ravichandran Ashwin, Ravindra Jadeja, Axar Patel, Shardul Thakur, Mohd. Shami, Mohd. Siraj, Umesh Yadav, Jaydev Unadkat, Ishan Kishan (wk).
Standby players: Ruturaj Gaikwad, Mukesh Kumar, Suryakumar Yadav.
