Shillong, Jymmang 08:
Ban pynïaid shakhmat ïa ka jingdawa ban khmih bniah ha kaba ïadei bad ka mat State Reservation Policy, ka Voice of the People’s Party (VPP) ha ka 12 tarik mynta u bnai, kan leit ban ai da ka jingthoh sha u Myntri Rangbah ka jylla u Conrad K Sangma bad ruh sha ki Myntri ka Sorkar MDA-2.
Haba pynbna ïa kane ka rai, ka VPP ha ka jingïakynduh bad ki lad pathai khubor ha ka sngi Nyngkong, u Nongaiktien ka VPP u Bah Batskhem Myrboh u la ong, ba ka seng ka ïawer ruh ïa ki paidbah ka Bri u Hynñiewtrep ba kin wan ban ïa synran lang ïa ki nongïalam ka VPP ha kane ka sngi ban leit ai jingthoh sha ka Sorkar ban dawa pynsangeh noh mardor ïa ka jingthung kam thung jam hapoh ki tnat treikam sorkar katba ym pat lah ban pynbeit ïa ka State Reservation Policy.
U Bah Batskhem u la ong, kane ka lynti ban shim da ka VPP ka long namar ka jingbym shimkhia bad leh kuman jong ka Sorkar namar ha ki bnai ba la leit ka la dep ban leit ai da ka dorkhas sha u Myntri Rangbah ka jylla ban dawa khot pynlong ïa ka dorbar kyrpang na ka bynta ban ïathir ïatai halor ka jingdonkam ban bishar bniah shwa ïa ka Reservation Policy bad ban pynsangeh ïa ka jingpyntreikam ïa ka ‘Roster System’.
Une u nongaiktien ka VPP u la ong ba ka seng ka wer ïa ki paidbah ban ïa synran lang ha kane ka sngi, ha kaba ki MLA ka seng hapoh ka jingïalam jong u Bah Ardent M Basaïawmoit kin leit ban ai da ka jingthoh sha ka Sorkar.
“Ngim banse ban shim da kane ka lynti namar kane ka sorkar MDA-2 kam shym la pyni kam ne leh eiei halor ka jingthoh ba la ai da ka VPP ban dawa dorbar kyrpang,” la ong u Bah Batskhem.
Nalor kata, u la ong ba kane ka jingdawa ka VPP ban pynsangeh noh mardor ïa ka jingthung kam thung jam hapoh ki tnat treikam sorkar bapher bapher ka dei halor ka nongrim ba dei ban pynkylla shuwa ïa ka bhah thung kam lane ka Job Reservation Policy bad ban pynsangeh shwa ïa ka jingpyntreikam ïa ka Roster System. U la ong ba kane kam dei na ka bynta ka jingmyntoi shimet jongno re jongno, hynrei ka dei na ka bynta ka bha ka miat ki samla hapoh ka jylla Meghalaya baroh kawei.
Haba pynpaw ka jingsngewnguh ïa ki paidbah kiba la ai ka jingkyrshan kaba pura ïa ka VPP ha ka jingïalang ba ka la pynlong ha kylleng ki district ban pynsngewthuh ïa ka jingdonkam ban bishar bniah ïa ka Reservation Policy bad ka jingdonkam ban pynsangeh shwa ïa ka Roster System, u Bah Batskhem u la ong ba ka seng ka khot bad wer ïa ki paidbah ha ka 12 tarik Jymmang 2023 ha ka por 2 baje nohphai sngi ba synran ïa ki nongïalam ka VPP ki ban leit ai da ka jingthoh sha ka sorkar ha Secretariat.
Shuh shuh une u nongaiktien ka VPP u la ong ba kane ka jingïawer ïa ki paidbah kam dei satia ka jingïakhih, hynrei ka dei tang ka jingpyni sha ka sorkar ba ka VPP ka ïoh ka jingkyrshan na ki paidbah khamtam haba ïadei bad ka jingdawa khot dorbar kyrpang ban ïatai halor ka Reservation Policy bad ka Roster System.
Ha kajuh ka por, une u nongïalam ka VPP u la buh ruh ka jingkyrpad sha ki paidbah ki ban wan ha kane ka sngi ba ki dei ban long ki briew kiba jai jai bad kiba kitkhlieh bad kiba bud ryntih ïa ka aiñ khnang ba kan nym mih kano kano ka jingkulmar.
