Paris, Jymmang:
Ha ka sngi ba la pynlong ia ka prokram sam khusnam sha ki nongialehkai bapher bapher jong ka Laureus Award, ka khubor ka iathuh ba u u khlur ialehkai na Argentina bad jong ka klob Paris Saint Germain u Lionel Messi, u la khur mynta ia ar tylli ki khusnam kata na ka jingiaknieh para marwei bad kum kawei ka kynhun ialehkai ruh kumjuh namar ka jingiai synshar ba radbah ka jong u ha ka kam ialehkai phutbol na ka klob bad ka ri bad kumjuh ruh ka jinglah ka jong u ban pynioh ia ka trophy jingjop sha ka ri ba u mihkhmat ha ka World-Cup 2022.
Ha kaba khatduh, u Messi u la ioh ban khur ia kata ka jingjop ba nyngkong ha ka lympung ialehkai World Cup ha ryngkat bad ka takma kaba u la khur ha ka sngi ba khatduh jong ka lympung ialehkai kaba la long ha Qatar ha u Nohprah 2022 hadien ba ka kynhun ka la rah ia ka thong jingjop pyrshah ia ka France da ka jingiashut tie-breaker. Katei ka la biang pura na ka bynta jong u ban khur ia katei ka khusnam ba mynta na ka jingiakhun para marwei bad ha kaba u lah pdiang ruh ia ka khusnam jingjop na ka bynta ka kynhun ialehkai ka jong u ha katei ka prokram sam khusnam kaba long mynta ha nongbah Paris.
U Messi uba la shimbynta ha katei ka prokram ryngkat bad ka kurim ka Antonela Roccuzzo, u long u rangialehkai uba la rah teng ia katei kajuh ka khusnam ha ryngkat lang bad u khlur ialehkai pynmareh kali F1 na ka ri Bilat u Lewis Hamilton kata ha u snem 2020.
Ha ka jingiakhun paramarwei ka jong u na ka bynta ka jingiaknieh ia ka tei ka khusnam, u Messi u la lah ban pynliem noh ia u Kylian Mbappé, uba lah trei shitom na ka bynta ka kynhun ialehkai ka jong u ka France ha ka jingiakhun phainal ha ka World Cup 2022. Ha katei kajuh ka sngi, ka nongialehkai mareh ba paw na Jamaica ka Shelly-Ann Fraser-Pryce kaba lah dep ban rah ia ka khusnam ha u bnai Nailar ka lah khur ia ka nam jop ba san ha ka prthei na ka 100m ha Eugene, Oregon, bad kaba lah khur ruh ia katei kajuh ka khusnam napdeng ki kynthei katba u lahduh US Open na ka jingialehkai Tennis u Carlos Alcaraz u khur mynta ia ka khusnam ‘World Breakthrough of the Year’.
Haba phai biang sha ka jingiakhusnam na ka jingialehkai phutbol, u khlur ialehkai ka Denmark bad kumjuh ruh jong ka klob Manchester United u Christian Eriksen u ioh mynta ka sien ban khur ia ka khusnam ‘Comeback’ namar jingwanphai biang sha ka kyrdan ba hajrong jong ka kam ialehkai kum u nongshong shnong ka ri Europe hadien ka jingkhyllem kynsan ka jong u ha madan ialehkai na ka daw jong ka jingshitom ha ka lympung ialehkai European Championship ar snem mynshuwa.
Kumta ruh ka nongialehkai ba duna dkhot-met na ka ri Switzerland ka Catherine Debrunner na ka tei ka prokram ba mynta ka la lah ban khur noh shalade ia ka ‘Disability Award’ hadien ka jingkhur jingjop ha kaba sdang jong ki ar lympung ialehkai Marathon.
Ka khubor ka iathuh ruh ba ia ka khusnam ‘The Sport for Good’ lah pynkupbor sha ka TeamUp kaba long ka prokram na ka bynta khynnah kiba ngut ha ka thma ia kaba lah wanrah shakhmat da u khlur ialehkai ka Barcelona bad Poland u Robert Lewandowski. Kumjuh ruh ka nongialehkai Olympic na China ha ka Ski Freestyle kaba lah rah ia ka nam kum ka lahduh ka Eileen Gu ka khur mynta ia ka ‘World Action Sportsperson.’
