Shillong, Jymmang 09:
Ki khlur ak phlim ka jylla kiba dei ki tyngshop ki puron kynthup ruh ki nongshna phlim ka jylla khamtam kiba don ha ka seng Meghalaya Film Makers Association ki la ai khublei bad kitbok kitrwiang ïa u Bah Commander Shangpliang uba dei u President jong ka MeFilMA uba la shah jied ban leit ïashim bynta ha ka Cannes Film Festival ka ban long ha France naduh ka 16 haduh ka 27 tarik mynta u bnai.
Na ka liang jong ka tnad Information and Broadcasting jong ka Sorkar India hadien ba ka la bishar bniah ïa ki application ka la jied ïa ki 2 ngut, kita ïa u Bah Commander Shangpliang uba dei u President jong ka Meghalaya Film Makers Association bad uba dei ruh ha kajuh ka por u director jong ka phlim kaba ïaid iew bha ka 9-Lad bad u Bah Nichlolas Kharkongor uba la shna ïa ka phlim lyngkot kaba la ai kyrteng ka ‘Dewlynnong’ kaba la ak da ki khlur ak phlim ba paw jong ka jylla kum u samla Albert Mawrie, Elizer Bareh, Sweety Pala bad kiwei kiwei nalor ka phlim kaba la paw bha kaba kyrteng ka Axoni bad kiwei kiwei.
Lah ruh ban kdew hangne ba ka la don ruh ka jingkynthoh na ki katto katne halor kane ka jingshah jied jong kitei ki 2 ngut ki nongshna phlim ha kaba u Bah Nicholas Kharkongor u la kyntait noh ban leit ïashim bynta sha katei ka tamasa phlim kaba pawnam ha pyrthei.
Hynrei na ka liang jong ki nongshna phlim kynthup bun ngut ki tyngshop ki la kyntu ïa u Bah Commander bad Bah Nichlolas ban nym pynsngew halor kane ka jingkynthoh, hynrei ba kin ïaid shakhmat ban leit ïashim bynta ha kane ka tamasa phlim khamtam ba kin nang lah ban leh kham bha ha ki kam shna phlim bad kumjuh ruh ban nang lah ban pynlong khambha ïa ka Meghalaya International Film Festival.
Ha kawei pat ka liang, ka Myntri ka tnat Information and Public Relations ka sorkar jylla, ka Kong M. Ampareen Lyngdoh, mynta ka sngi ka la shong jingïalang bad ki tnat Art and Culture, Information and Public Relations bad Tourism ban ïakren halor ka jingshah jied jong u Bah Commander bad u Bah Nicholas ban leit sha katei ka tamasa phlim.
Ha kane ka jingïalang hadien ba la peit bniah ïa ki kot ki sla jong u Bah Pradip Kurbah bad u Dominic Sangma, la shim ïa rai ban phah noh da ka kyrteng jong u Dominic sha ka tnat Information and Broadcasting jong ka sorkar India khnang ba un leit ïashim bynta ha ka Cannes Film Festival namar ka jingkynran dien noh jong u Bah Nicholas.
La rai ruh ba nangne shakhmat, lada don ka jingdonkam ban leit ïashim bynta ha ki tamasa phlim jong ka pyrthei ne ka ri, kan don noh da ka selection committee ban khlieh da u Chief Secretary.
