Shillong, Jymmang 09:
Ka Laban Bengalee Boys’ Higher Secondary School (LBBHSS), Shillong ha kane ka kynti ka la wan shakhmat da kaba ïoh bat ïa ka kyrdan banyngkong ha ka eksamin Higher Secondary School Leaving Certificate (HSSLC) bad ïa kane la sakhi lyngba ka risol kaba la pynmih da ka Meghalaya Board of School Education (MBoSE) ha ka Sngi Ba-ar.
Ki risol kiba la pynbna ki kynthup ïa ka tnad pule ‘Science’, ‘Commerce’ bad ‘Vocational’.
Haba phai sha ka thup ‘Top-10’, ka LBBHSS ka la ïoh 2 tylli ki kyrdan ha ka tnad pule ‘Science’ bad 2 tylli ha ka ‘Commerce’.
Ha ka tnad pule ‘Science’, ïa ka kyrdan ba nyngkong la ïoh da u Arnab Dutta jong ka LBBHSS (483 marks) katba ka kyrdan ba-ar ka la leit sha ka Steffi Niza W. Snaitang na St. Edmund’s Higher Secondary School, Shillong (477 marks). Ka Eshita Bhattacharjee na St. Anthony’s Higher Secondary School, Shillong ka la wan ha ka kyrdan ba-lai bad ka la ïoh 469 ‘marks’.
Na ki 3,635 ngut ki khynnah pule kiba ïakhun ha katei ka eksam jong ka tnad pule ‘Science’, 2,866 ngut ki la ‘pass’ bad ka jingdon jong baroh ki khynnah kiba la ‘pass’ ha kane ka eksamin ka long 78.84%.
Na kitei, 1,369 ngut ki la wan ha ka kyrdan ‘First Division’, 1,297 ngut ha ka ‘Second Division’ bad 55 ngut ha ka ‘Third Division’.
Ha kawei ka liang, ha ka tnad pule ‘Commerce’, u Rishab Purkayastha na LBBHSS uba la ïoh 484 ‘marks’ u la wan ha ka kyrdan banyngkong, katba u Akshat Poddar na St. Anthony’s Higher Secondary School, Shillong u la ïoh ïa ka kyrdan ba-ar (478 marks). Ïa ka kyrdan ba-lai la ïasam hapdeng ka Satakshi Das na St. Anthony’s Higher Secondary School, Shillong (463 marks) bad ka Sneha Paul na St. Anthony’s Higher Secondary School, Shillong (463 marks).
Ka jingdon jong ki khynnah pule kiba ‘pass’ ha ka tnad pule ‘Commerce’ ka long 79.31%. Kumjuh, na ki 2,383 ngut kiba la ïakhun ha kane ka eksam mynta u snem, 1,890 ngut ki la ‘pass’.
Shuh shuh na kitei, 768 ngut ki la wan ha ka kyrdan ‘First Division’, 938 ngut ha ka ‘Second Division’ bad 139 ngut ha ka the ‘Third Division’.
Haba phai pat sha ka ‘Vocational’, na ki 16 ngut ki khynnah pule kiba ïakhun ha kane ka eksam, 15 ngut ki la ‘pass’ bad ka jingdon jong baroh kiba ‘pass’ ka long 93.75 na ka 100.
