Dang ïakren ka Taiwan halor ki tiar thma ba $500 Million na ka US

Taipei, Jymmang:

U Myntri ka tnat iada ri jong ka Taiwan, u Chiu Kuo-cheng ha ka Sngi Nyngkong u la ong ba ka Taiwan ka dang pynbeit bad iakren bad ka United States na ka bynta ka $500 million ka song ki tiar thma ban ioh na ka US hapoh jong une u snem.

Namar kumba la iohi mynta, katei ka ri dew lynnong ‘Taiwan’ ka don hapdeng ki jingma bad ka lah ban shah thombor ha ki bor ba nabar ha kano- kano ka por bym lah tip. Hynrei kawei na ki ri kiba wanrah jingma ia ka Taiwan ka dei ka China. Ka China ka ju kam trai ruh ba katei ka dew lynnong ka long ka bynta jongka hi bad ba kan sa shim biang noh shalade ynda ka la sngew donkam ban leh ia kata.

Namarkata ruh la ong ba ka China ka ju phah ia ki shipai duriaw bad shipai liengsuiñ jongka ban leit kilan sha ka duriaw bad ki bynta ba markhap bad kylleng sawdong jong ka Taiwan, khnang ban pyni ba ka China ka long trai ia katei ka ri dew lynnong.

kumta u Kuo-cheng ha katei ka sngi u la ong ba watla ka Taiwan ka la dep ban iakren naduh ki por ba la leit, ba kan ioh ia ki tiar thma na ka United States, hynrei la ïohsngew ia ki khubor halor ka jingpynslem bad jingthud haba iadei bad katei ka jingiakut.

Katei ka song ba $500 Million kan long ban pynkhlaiñ ia ka tnat iada jong ka Taiwan, ba kan ioh ban pynbit pynbiang ia ka tnat iada khnang ba kan long ba la pynkhreh lada don ka jingïakynad ne lada don ba leit thombor ia ka Taiwan ha kano kano ka por bym lah tip.

Namarkata utei u Myntri ka Taiwan u la ong ba katei ka song ba la dep ban iakut bad ka United States, ka la dei ban urlong bad ban poi sha Taiwan hapoh jong une hi u snem.

Watla katta, utei u heh ka Taiwan, um shym la ai jingpynshai pat kiba kumno ki jait tiar ki ban kynthup hapoh jong katei ka song kaba $500 Million.

La ong ba ka United States naduh ki phew snem ba la leit ruh ka ju phah ia ki tiar siat bad tiar thma sha ka Taiwan kumba la iakut haba iadei bad ka jingiadie- iathied ia kitei ki tiar bad ka Taiwan.

Hynrei, ha kane ka por, la ioh jingtip ba ki don ki jingpynthud hapdeng ka jingiaid lynti bad ka jingpynpoi ia kitei ki tiar sha Taiwan.