Nongpoh, Jymmang 09:
Ha ka step phyrngab jong ka sngi Ba-ar, kumba hynñiew tylli ki dukan ba kynthup ïa ki dukan die soh bad dukan die sha ki la ingkhong khait na ka jingbam duh ki thylliej ding ha ki ar tylli ki jaka, kata hakhmat jong ka Nongpoh Town Shopping Complex bad kawei hakhmat jong ka Meghalaya Cooperative Apex Bank.
Katkum ka jingtip ba la ïoh lum, la ïathuh ba kane ka la jia ha ka por kumba 2 baje eiei step phyrngab. Ïa kane ka jingjia la lap nyngkong da ka kynhun ïaid pahara jong ka E/67 Bn ka CRPF kaba don ha Nongpoh.
La ïathuh ruh ba tang mar shu ïohi ïa kane ka jingjia, na ka liang ki 49 ngut ki pulit CRPF jong ka E/67 Bn kiba don kumba lai kynhun ki la leit mareh ban ïakhun pynlip ïa katei ka ding kaba la klang da kaba theh da ka um na ka pung kaba don marjan.
Hadien kata kitei ki pulit CRPF ki la pyntip ruh mar mar sha ki bor pulit ka thanat Nongpoh bad ruh sha ki pulit pynlip ding ka Fire & Emergency Service ka Nongpoh, kiba la wan poi pat kham hadien. Dei lyngba ka jingwan poi jong katei ka kynhun pynlip ding sa lah ban tem noh ïa ka ding kaba la sdang ban pur sha kiwei ki dukan bad ki ïing ba marjan.
Nalor kata, la ïoh jingtip ruh ba dei lyngba ka jingshimkhia jong kitei ki pulit CRPF ba ki katto katne tylli ki kali kiba la pynsangeh hakhmat kitei ki dukan ruh ki la lait na ka jingkem ding.
Ha kajuh ka por la ïoh jingtip ruh ha ka jingkem ding hakhmat ka Meghalaya Cooperative Apex Bank, kawei ka dukan die soh ka la ingkhong lut, katba ka ATM jong katei ka bank ka la lait salit na ka jingkem ding lyngba ka jingtrei shitom jong ki pulit CRPF.
