Shillong, Jymmang 09:
Ka Hynñiewtrep National Youth Front (HNYF) ka la pynpaw ïa ka jingsngewbitar kaba khraw bad kaba dap da ka jinglyngngoh ba ki kynhun pulit ha ka step phyrngab jong ka 9 tarik mynta u bnai ki la leit ban kem ïa ki 9 ngut ki dkhot jong ka seng kiba shong ba sah ha Umpling bad Nongrah.
Katkum ka jingïathuh, la ong ba ka jingshah kem jong kitei ki 9 ngut ki dkhot ka seng ka dei halor ka ejahar ba la mudui da kawei ka nongdie dukan ha Khyndailad pyrshah ïa kitei ki 9 ngut ki dkhot ka seng da kaba ka la kynnoh ba ki la donkti ban pynpra ïa ka dukan ha ki sngi ba la dep.
La ïohi ba na ka liang ka HNYF ha ryngkat ki kmie ki kpa jong kitei ki dkhot kiba la shah kem ki la leit sha thanat Sadar ban kylli ïa ka daw kaba la pynlong ïa ki pulit ban kem ïa kitei ki 9 ngut ki dkhot ka seng bad ka la don ruh ka thma ktien kaba heh bha hapdeng ki nongïalam ka seng bad ki pulit.
Haba kren sha ki lad pathai khubor, halor ka jingwan kem ki pulit ïa ki dkhot jong ka seng kiba shong ba sah ha Umpling bad ha Nongrah, u President ka HNYF u Bah Blessed Dkhar u la ong ba ki pulit kiba wan kem ïa ki 9 ngut ki dkhot ka seng ki khlem ïaid lyngba ki Dorbar Shnong bad ki la wan ha ka rukom kaba long kum ki nongtuh da kaba kah dur bad khlem da burom ruh wat ïa ki bahaïing bahasem. U la ong ruh ba kane ka jingleh jong ki pulit ka la pyntieng pynsyier kylla ïa ki bahaïing ha sem jong ki dkhot ka seng.
“Ha ka jingshisha ki la dei ban ïaid lyngba ka shnong bad haba ki wan kem mynstep, ki dei ban ïakren bad u Rangbah Shnong khnang ba ka shnong kan ïoh ban kren ïa ki kmie ki kpa halor kano ka daw bad halor kaei ka nongrim ba la kem ïa ki”, la ong u Bah Blessed Dkhar.
Na ka liang u President ka seng u la buh jingkylli ïa ka tnat pulit da kaba ong ba ïa uba shah lute ha Mawöng, uba shah siat ha Mawshun kiba shah siat ha Mukroh balei haduh mynta ym pat lah ban kem haduh mynta, hynrei ïa ki briew kiba long ki trai shnong pat ki pulit ki kloi ban kem bad ha kajuh ka por u la ong ba ka rukom treikam ka tnat pulit ka pynpaw shai ïa ka jingleh shiliang bad kyntu ban trei ïa ka kam kaba long salonsar ïa baroh.
Shuh shuh ha kane ka sngi na ka liang ka seng hadien ka jingïakren bad pan jingthoh na ki bor pulit hapoh ka thanat Sadar, na ka liang ki pulit ki la pyntip ba ïa kane ka kam la dep pynngat hapoh ki kyndon aiñ mukotduma bad ka shong sa tang ka ïingbishar ban pyndep ïa ki kam ba dang sah.
Na ka liang ki kmie ki kpa jong kitei kiba la shah kem ki la pynpaw ïa ka jingsngewsih halor kane ka jingjia bad khamtam eh ïa ka jingwan kem jong ki pulit khlem kino kino ki sakhi sabut kiba biang ban pyni ba ki donkti shisha ban leh ïa katei ka kam.
Nalor kata, na ka liang ki kmie jong kitei ki 9 ngut ki dkhot ki la ong ba ha ka por ba ki pulit ki wan ban kem ïa ki khun jong ki ruh, ki khlem ïathuh eiei na ka daw aïu ba ki la kem, hynrei ki la shu phah kyrsiew ïa ki na ki jingthiah, hynrei ki la shu tan ïa kitei ki 9 ngut ki dkhot ka seng bad thep ïa ki hapoh ka kali ban kit shapoh ka thanad Sadar.
