Shillong, Jymmang 09:
Ki shipai khappud Border Security Force (BSF) ki la kem noh ïa lai ngut ki para shipai jong katei ka kynhun kiba la kynnoh donkti ban ther kuli ïa ka trok kaba lam sha ka jingïap jong u Bah Roning Nongkynrih ha Mawshun, kaba hap hapoh ka Pynursla Sub Division.
Ïa kine 3 ngut ki shipai la kem noh ha ka Lah Sngi U Blei jong ka taïew bad ka jingtohkit mynta ka la ïaid shakhmat. La ong ruh ba na ka liang ki shipai BSF ki la pynmih ïa ka hukum ban pynlong da ka Court of Inquiry halor kane ka jingjia.
Kum ban shu pynkynmaw, u Bah Roning Nongkynrih (32 snem ka rta) na ka shnong Jalynteng u la shah siat ïap ha ki shipai BSF katba u dang kit ïa ki masi ha ka trok ha ka miet Sngi Thohdieng.
Hadien katei ka jingjia, u Inspector General ka BSF Meghalaya Frontier u Pradip Kumar u la hukum ban pynlong da ka Court of Enquiry ba lamkhmat da u ophisar ha ka kyrdan DIG. Hadien ba la leh ïa ka jingtohkit la ai ïa ka hukum ban kem noh ïa ki lai ngut ki shipai BSF kiba la tip kyrteng kum u Moni Singh uba dei u Head Constable, u Sengel Singh uba dei u Constable bad u Kdam Kishore uba dei u nongñiah kali.
Katkum ka jingïathuh ki heh ophisar ka BSF, la sospon noh mar mar ïa u head constable uba siat ïa u Bah Roning haduh lai kylla na ka Beretta SMG kaba la pynlong ba un khlad noh hashen.
Halor kane ka jingjia, na ka liang jong ka KSU ruh ha ka Lah Sngi U Blei ka la pynlong ïa ka jingïalang paidbah ba jai jai ha Pynursla ban pynbor ïa ki BSF bad ka Sorkar Jylla ban kem bad pynshitom ïa ki BSF kiba donkti.
