San Francisco, Jymmang:
Ka long ka khubor kaba sngewpher-koit ban iohsngew ba u nongshem jong ka rynsan pathai ka “Facebook” u Mark Zuckerberg uba la shimbynta ha ka sien nyngkongeh ha ki jingialehkai Jiu-Jitsu jong ka jingialehkai Martial Arts u la pynseisoh ia ka kam ialehkai ka jong u kaba u ju sngewtynnad eh ha ka jingim da kaba leit phai iing ha ryngkat bad kawei ka takma Rupa bad ki takma Ksiar na kawei ka lympung ialehkai ba la pynlong ha Woodside High School ha California kaba don hajan ka shlem treikam ba ha khlieh duh jong katei ka rynsan pathai ha Silicon Valley.
Na ka liang jong utei u riew rangbah u iathuh ha u snem ba lah dep ba u lah sdang ha ka ban pynrung halade ia ka jingialehkai Martial Arts naduh ka por ba wan ka jingpang khlam COVID-19 ha kylleng ka pyrthei.
Kumta ka jingshimbynta ka jong u ha katei ka jait jingialehkai ka lah iarap ruh ia u ban nang iai pynkhlain shuh shuh ia ka bor jingkhlain bad kumjuh ruh ka jinglah ha ka ban iakhun pyrshah ia kiei kiei kiba wan kah lynti ha ka kam shakri ka jong u. Kumta u Zuckerberg u lah hikai pyntbit ialade bad u Dave Camarillo; uba lah hikai ia shibun ngut ki nongkhur nam lahduh ka UFC mixed Martial Arts (MMA) champions.
Ka Jiu-Jitsu ka long ka long kawei na ki rukom ialehkai ki nong Brazil ha kaba ka don ia ka jingiapher bad ka MMA, ha kaba katei ka jait jingialehkai ki nongiakhun pyrshah ki pyndonkam ia ka jingia aireng ka jong ki da kaba shu ia-bat bad teh lakam ia ka rukom ialehkai ka jong ki ban lait na ka jingshah pynliem madan ha ka jaka ba kin iakynjat ne iakura paramaki kumba long ka jing-ialehkai MMA.
