Hadien bun bnai ba ki la ap shitom, ki paidbah nongthep ‘vote’ ka Sohïong konstitwensi kin sa jied ïa la u nongthaw aiñ bad u dkhot ka Ïingdorbar Thawaiñ ha ka Sngi Balang, kata, 10 tarik Jymmang, 2023. Ka Sohïong konstitwensi ka don 34,783 ngut ki nongthep ‘vote’ bad na kine, 17,687 ngut ki dei ki kynthei, bad kine ki nongthep ‘vote’ baroh ki don ha ki 63 tylli ki ‘Polling Station’. Ka jingïalap ilekshon ha Sohïong ka la long kaba khluit bha tar khamtam hapdeng ka National People’s Party (NPP) bad ka United Democratic Party (UDP). Ki nongïalam jong kine ki artylli ki seng ki la ïa shniah iwei ïa iwei pat ha ban da biang wat la ki don lang ha ka sorkar Meghalaya Democratic Alliance (MDA 2.0). U Symbud Myntri Rangbah, Bah Prestone Tynsong, u la kham pyni ïa ka jingnud jong u ban kawang ktieh beit ïa ka seng UDP bad ki nongïalam jong ka. Hynrei ha ka ilekshon, ym ju don paralok. Ka jingïather ka ïaid beit kumba ka dei ban long bad katkum ka jingdawa jong ka por bad ka rukom long ka ilekshon. Na ka liang kiwei pat ki seng kiba don ha kane ka lympung ïakhun, ki la kham leh kynjah bad namarkata, ngi ïohi beit tang ïa kine ki artylli ki seng kiba don hakhmat. Ki don hynriew ngut ki kyrtong ha kane ka ilekshon kiba kynthup ïa u Bah Samlin Malngiang na ka NPP, u Bah Synshar Lyngdoh na ka UDP, u Bah S Osborne Kharjana na ka Congress, u Bah Sandondor Ryntathiang na ka HSPDP, u Bah Stodingstar Thabah na ka TMC bad u Bah Serap Eric Kharbuki na ka BJP.
Tang ki paidbah ka Sohïong konstitwensi ki ban tip bad sngewthuh ïano kin ai jingkyrshan ha kane ka kynti khamtam hadien ba ki la ïohi bad ïohsngew ïa ka jingwan ïalap bad ïakynduh ki kyrtong ïa ki. Ngi shu kyrmen ba kin ïa mih ryntih ki nongthep ‘vote’ namar kane ka dei ka lad kaba wan tang shisien ha ka san snem. Ngi la ïohi ha kane ka ilekshon kaba la dep ha ki 59 tylli ki konstitwensi ba ka jingwan ki nongthep ‘vote’ kam da khlaiñ haduh katta-katta. Ki la don kiba la shu pynlehnohei ïa ka jingdon kyrteng ha ki kot thep ‘vote’. Ngi kyrmen ba ki nongthep ‘vote’ ka Sohïong kin ym bud tynneng ïa kiwei kiba jaituh ban leit thep ‘vote’, hynrei ba kin mih ryntih beit ban pyndonkam ïa ka iktiar bad ka hok ban jied ïa u nongthaw aiñ. Tangba dei ban jied da ka jingkitkhlieh. Kiba bun ki khmat ki phai sha ki nong Sohïong ha kane ka kynti namar dei sa tang kane konstitwensi ka bym pat ïoh ïa la u MLA. Ki paidbah na kiwei pat ki konstitwensi ruh ki ïa kwah tip noh mano uta u MLA bathymmai ka Sohïong. Tangba baroh ngin hap ban ïa ap shitom lang ïa ka 13 tarik Jymmang, 2023 ban tip mano u ban rah ïa u ‘nam tam.
Hapdeng ka jingshongshit jong ka jingïalap ilekshon, ka long kaba sngewlyngngoh pat ban tip ba ki bor pahara ki khlem pat ïoh kurup pisa eiei, hynrei kaba la ïoh kurup ka dei ka kyiad kumba 465 litar haduh mynta. Napdeng ki jingpynkheiñ ïa ki kyndon pynïaid ilekshon, ki bor ba dei khmih ki la phah jingthoh ban pan jingshai halor ka rukom kren ïalap ilekshon kaba long kum ka jingisih briew. Ka rukom ïalap ilekshon ha Sohïong ka la long kaba khor bad kynthoh hapdeng ki kynhun ba ïaleh ilekshon khamtam hapdeng ka UDP bad ka NPP. Haduh mynta ki bor pahara ilekshon ki khlem pat ïoh kurup pisa ne kiwei pat ki tiar kiba pyndonkam ban khroh ïa ki paidbah ban ïoh vote. Sngewkyndit shikatdei ba kita kiba hap ban khynra kali ki khlem pat ïoh ban kurup wat tang shi naïa ruh ha kaba ïadei bad ka ilekshon ha Sohïong. Lehse ka ilekshon ha kane ka konstitwensi ka long shisha kaba khuid ba suba bad ka bym don tngit eiei wat la baroh ngi tip ba ka bor jong ka pisa ka treikam ha kano-kano ka ilekshon. Ngi la ïohsngew ruh ïa ki jingkynnoh ha ka por ïalap ilekshon ba ka don ka jingpyndonkam ïa ka pisa ha Sohïong konstitwensi.
Barabor, ka ilekshon ka dei jong ki paidbah bad ym jong ki seng saiñpyrthei lane ka sorkar lane ka Election Commission of India. Khlem ki paidbah, ym don ilekshon. Ki dei ki paidbah kiba rai. Don kiba rai da ka jingbym hun, don kiba rai hadien ba shah pynthame, don kiba rai da ka jingshongshit, bad don ruh kiba rai da ka jingkitkhlieh. Kata ka rai kan sa paw ha ka sngi ñiew ‘vote’ bad kin don ruh ki ban bynnud kylla. Kata ka dei ka jinglong briew. Ka jingbabe ka ju wan ynda la dep ban shim ïa ka rai ban leh ïa kano-kano ka kam. Napdeng ki 34,783 ngut ki nongthep ‘vote’ ha Sohïong, kin bun ki ban ïoh jied nongthaw aiñ ha ka sien banyngkong. Ngi kyrmen ba kine ki samla kin mih shakhmat ban pyndep ïa la kamram. Lada ki samla ki randien na ka saiñpyrthei, ka lawei kan ym long kaba itynnad. Ngi kyrmen ruh ba ka jingthep ‘vote’ kan long kaba jai-jai bad kaba lait na kano-kano ka huri hura. Ka jingshongshit kam dei ban wanrah ïa ki kam ïakynad hapdeng para shnong para thaw namar ynda la dep ka ilekshon, baroh ngin hap ban ïa donkam biang iwei ïa iwei pat kumba ka ju long baroh shi katta.
