Las Vegas, Jymmang:
Ka tnat Las Vegas Metropolitan Police ha ka Lah Sngi U Blei, ka la iathuh ba ha katei ka jingjia uwei u briew u la mynsaw hadien ka jingsiat hapoh ka skul Von Tobel Middle School kaba don hapoh ka nongbah Las Vegas jong ka United States.
Haduh jong ka step Sngi Ba-ar, ka tnat Las Vegas Metropolitan Police ka dang ialeh ban wad bniah bad ban shim jingtohkit halor ka daw jong katei ka jingsiat ha katei ka sngi. Shuh shuh ruh la iathuh pat ba ia utei uba la shah siat, la pynkit noh mar-mar sha ka jaka sumar kaba don hangtei hajan hi.
Ka tnat pulit jong ka nongbah Las Vegas ka la iathuh ba katei ka jingjia ka dang iaid shakhmat bad haduh kane ka kynti, ym pat lah ban ioh jingtip tikna ba balei ka leit jia kumtei ha katei ka sngi. Kumta ki pulit ki dang ialeh ban tohkit ia kiba don ha katei ka jaka ha katei ka sngi bad ha kajuh ka por ruh ki dang thwet ia utei u runar uba siat ha katei ka jingjia.
Katei ka jingsiat ka la jia ha ka por kumba 12:38 jong ka Lah Sngi U Blei, hapoh jong ka dong 2400 block jong ka N.Pecos Road.
Hashwa kane, ki pulit ka Las Vegas ki la pynbna ba katei ka skul kan hap ban khang dam noh shwa ia mynta shi por, katba ka jingtohkit ka dang iaid shakhmat. Kumjuh ruh ka tnat pulit ka la iathuh ba la dep ban khang noh ia ki surok kiba pyniasoh bad katei ka thaiñ bad kumta ruh na ka liang jong ki pulit, ki la kyrpad ia ki paidbah nongshong shnong ba kin kiar na katei ka jaka ioh lehse kano-kano ka jingma kan wan jia ia ki. Wat la katta, ki pulit ki pyntip ba ka jinglong- jingman ha katei ka jaka ka la iaid beit- iaid ryntih bad kam don jingma shuh ia ki paidbah jong katei ka jaka.
