Shillong, Jymmang 09:
Ki paidbah ka Sohïong konstitwensi kin sa ai ïa ka rai jong ki ïano napdeng ki hynriew ngut ki kyrtong kin phah ban mihkhmat ïa ka konstitwensi sha ka Ïingdorbar Thawaiñ kaba khatwei ka Jylla ha kaba ki paidbah kiba don palat 34 hajar ngut kin thep ïa ka ‘vote’ jong ki ha ki 63 tylli ki jaka thep vote.
Ka Election Commission ka la buh sngi mynta ka 10 tarik Jymmang kum ka sngi ba ki paidbah kin leit thep ‘vote’ na ka bynta ban jied ïa u MLA bathymmai ka Sohïong konstitwensi.
Ka jingthep ‘vote’ kan sdang ha ka por 7 baje mynstep bad kan kut ha ka por 4 baje janmiet ha baroh 63 tylli ki jaka thep ‘vote’ hapdeng ka jingpahara bad pyrkhing bha ki pulit Central Armed Police Force (CAPF) kiba don 5 pyrton bad khyndiat ngut ki pulit ka Jylla kumba 69 ngut.
Ha ka jingshisha, ki paidbah ka Sohïong konstitwensi ki la dei ban thep ‘vote’ ha ka 27 tarik Rymphang, 2023 lem bad kiwei pat ki 59 tylli ki konstitwensi, hynrei la pynsangeh ïa ka jingthep vote namarba khlad noh u Myntri Sorkar barim ka Jylla u Bah HDR Lyngdoh uba dei ruh u kyrtong ka United Democratic Party (UDP).
Hadien katei ka UDP ka la sei bujli da u Bah Synshar Lyngdoh kum u kyrtong ka seng, uba dei ruh u pyrsa kur jong u Bah HDR Lyngdoh.
Baroh ki nongthep vote ha Sohïong ki don 34,783 ngut, kita, 17,096 ngut ki shynrang bad 17,687 ngut ki shynrang.
Kiba la kynjoh palat 80 snem kiba la dep ban thep vote na la ïing ki don 134 ngut bad kiba duna dkhot met kiba la thep vote na la ïing ki don 53 ngut.
Ki nongpynïaid ïa ka jingthep vote ki don 252 ngut ha kaba ki nongpeit pyrman ki don 6 ngut bad ki nongring dur ki don 6 ngut.
La pyndonkam da ka kor thep vote (electronic voting machine) bad ka VVPAT ban ñion ïa u budam uba don mar pyrshah ka shap jong ki kyrtong kiba ïakhun.
Ka jingthep vote ha Sohïong konstitwensi ka long ban rai ïa ka bok ka nusib jong ki hynriew ngut ki kyrtong kiba mih ban ïakhun ïa ka ilekshon, bad ha kajuh ka por ka dei ruh ka jingïakhun ban pyni mano ba kham khlaiñ hapdeng ka National People’s Party (NPP) bad ka United Democratic Party (UDP); kiba dei ki seng saiñ pyrthei kiba ïatreilang ha ka Sorkar MDA-II kaba lamkhmat da ka NPP.
Ka NPP kan ïoh 29 ngut ki MLA lada ka jop sa na Sohïong konstitwensi bad ka UDP ruh kan sa kiew sha ka 12 ngut ki MLA lada ka jop.
Ki kyrtong kiba ïakhun ki don 6 ngut kiba kynthup ïa u MLA barim u Bah Samlin Malngiang uba dei u kyrtong ka NPP, u kyrtong ka UDP u Bah Synshar Lyngdoh, u kyrtong ka Congress u Bah S Osborne Kharjana, u Bah Sandondor Ryntathiang u kyrtong ka HSPDP, u Bah Seraph Eric Kharbuki u kyrtong ka BJP, bad u Bah Stodingstar Thabah u kyrtong ka All India Trinamool Congress (AITC).
