Nongstoiñ, Jymmang 09:
Ka Anderson Higher Secondary School kaba don ha Upper New Nongstoiñ, West Khasi Hills ka la ïoh biang ban rung kyrteng ha ka thup shiphew ne ‘Top Ten’ jong ka result eksamin Higher Secondary School Leaving Certificate (HSSLC) ba la pynbna da ka Meghalaya Board of School Education ha ka Sngi Ba-ar.
Ka jingïoh rung biang kane ka skul ha ka thup shiphew ka la long hadien ba ka samla Daiairi Nongrem ka la ïoh ïa ka kyrdan kaba 10 na ka Commerce Stream bad ruh ïa ka ‘distinction’ ha baroh ki sobje,k bad ïoh ruh ki’ mark’ ba heh duh ha ki ar tylli ki sobjek, kita ha ka English bad ka Alternative English.
Lah ban kdew ba na katei ka skul ki la don haduh 18 ngut ki samla na ka Commerce Stream kiba la ïakhun ïa kane ka eksamin. Kitei baroh ki la ïoh ban kheit ïa u soh jong ka jingjop.
Haba phai pat ha ka Science Stream na kane ka skul, ki la don 16 ngut kiba wan ha ka kyrdan 1st Division, 9 ngut ha ka kyrdan 2nd Division.
“Ngam shym la poi pyrkhat ba ngan ïoh ïa kane ka kyrdan wat hadien ba nga la dep ban thoh ïa ka eksam ruh,” la ong ka samla Daiairi Nongrem haba kren bad ki nongthoh khubor.
Nangta shuh shuh ka samla Daiairi ka la pynpaw ruh ïa ka jingsngewnguh nyngkong eh ïa U Blei uba la don ryngkat bad ka, ha ka jingïakhun ïa katei ka eksamin, kumjuh ruh ïa ka kmie u kpa ki bahaïing hasem bad khamtam ïa ki nonghikai kiba la btin lynti ïa ka, wat ha kiba bun ki jingeh kaba ka ïakhun ïa katei ka eksamin.
Nalor kata, ka samla Daiairi ka la pynpaw ruh ïa ka jingthrang ba la kumno-kumno kan ïoh ban pyndep ïa ka jingpule kum ka Chartered Accountant.
