Shillong, Jymmang 09:
Ka Shillong Sports Association (SSA) ka la pynkynriah noh ïa ka jaka ïalehkai na Second Ground, Polo sha ka madan kaba thymmai jong ka Lawmali kaba don mar pyrshah ïa ka Regional Blood Centre, Pasteur Hills Shillong.
Kane kan long naduh ki jingïakhun quarter final jong ka U-10 (Boys) Football League 2023 namar ka jingbym lait ka madan Second Ground kaba don ha Polo.
Ki phra tylli ki kynhun kiba la rung sha ka quarter final ki long ka Pay For Right Football Academy, Mawlai SC, Umphyrnai SC, Kynton U Mon, Sohryngkham, Mylliem Grassroot, Mawreng bad ka Sacred Heart Football Academy.
Kat kum ka prokram ïalehkai, la ong ba ïa ki jingïakhun quarter final yn pynlong ha ka 13 tarik, ha kaba ka Pay For Right kan ïakhun pyrshah ïa ka Mawlai, ka Umphyrnai ïa ka Kynton U Mon, Sohryngkham ïa ka Mylliem Grassroot bad ka Mawreng ïa ka Sacred Heart.
Ïa ki jingïakhun semi final yn pynlong ha ka 20 tarik bad ka final kan long ha ka 27 tarik mynta u bnai.
