Jowai, Jymmang 09:
Ki khynnah ïalehkai shynrang bad kynthei jong ka Amlarem Block ki la rah ïa ka nam lahduh ha ka lympung ïalehkai Chief Minister District Level Open Under-12 Football Tournament.
Ïa kane ka lympung la pynïaid da ka shlem treikam u District Sports Officer (DSO), West Jaiñtia Hills District ha Kiang Nangbah Stadium, Ladthadlaboh Jowai ha ka Sngi Ba-ar.
Ïa kane ka lympung ïalehkai la dep ban pynïakhun shwa ha ki 4 tylli ki Block; kita ha Thadlaskeiñ Block, Laskeiñ Block, Amlarem Block bad ha Namdong Block, katba ïa ka jingïakhun semi final bad final la pynlong ha nongbah Jowai.
Ïa kane ka lympung la wan ban pynhap pyrda da u Working President ka West Jaiñtia District Sports Association (WJDSA) u E.M.H Passah ha ka jingdonlang u District Sports Officer (DSO) u Khroobok Passah, u Vice President WJDSA u Patrick Lamare ki dkhot bad nongïalam ka WJDSA bad kiwei kiwei.
Ha ka jingïakhun final ha ka liang ki kynthei, ka Amlarem Govt. LP School ka la pynliem noh ïa ka Mukhla Grassroot Centre da 1-0 kol bad ïa kane la thep da ka Steffy Jungai ha ka minit kaba 35.
Katba na ka liang ki shynrang, ka Padu United (A) ka la pynliem noh ïa ka Ummulong Grassroot Centre da 1-0 kol bad ïa kane la thep da u Hopeful Pohthmi ha ka minit kaba 55 lyngba ka penalty ha ka jingai por tam (extra time).
Ki khynnah ïalehkai ka Amlarem Block kin sa leit ban mihkhmat ïa ka District ha ka jingïakhun jong ka kyrdan State Level ka ban long ha ka 11 tarik Jylliew.
