Shillong, Jymmang 09:
Ka NEHU Shillong bad ka Meghalaya Police (MLP) ki la long ki ar tylli kiwei pat ki kynhun kiba la rung sha ka semi final ha ka Inter Office T20 Cricket League 2023 ba la pynïaid da ka Shillong Cricket Association.
Ha ka jingïakhun quarter final kaba nyngkong kaba la long ha ka Sngi Ba-ar ha madan Polo, ka NEHU Shillong ka la pynliem noh ïa ka GHADC da 3 run. Ka NEHU Shillong kaba la kam trai shwa ban tied nyngkong, ka la kamai 115 run bad shah pynkhyllem 5 wiket ha ki 20 over. U Manik Das u la tied 40 run na ki 45 bol bad u Teiborlang u la ïoh 33 run na ki 42 bol. Katba u Chonseng Momin u la khur 2 wiket bad ïa ka 1 wiket la khur da u Drewil Marak na ka bynta ka GHADC.
Haba wan beh ïa ka thong, ka GHADC ka la kamai tang 112 run bad shah pynkhyllem 6 wiket ha ki 20 over. U Mingnam u la tied 28 run na ki 35 bol bad u Twel Marak u la ïoh 26 run na ki 17 bol. Katba u Manik Das bad u Eugene K. Kharsyntiew ki la khur mar 2 wiket na ka bynta ka NEHU Shillong. U Manik Das u la ïohpdiang ïa ka khusnam ‘Player of the Match’.
Haba phai sha kawei pat ka jingïakhun ba ar, ka MLP ka la pynliem noh ïa ka Raj Bhavan da 16 run. Ka MLP ka la kam trai shwa ban tied nyngkong ha kaba ka la kamai 139 run bad shah pynkhyllem 5 wiket. U Pankaj Roy u la tied 45 run na ki 41 bol bad u Johnward u la ïoh 29 run na ki 17 bol. Katba u Robin Chettri u la khur 3 wiket bad 2 wiket la khur da u Rakesh Thakur Raj Bhavan.
Haba wan ban beh ïa ka thong ba la buh da ka liang pyrshah, ka Raj Bhavan ka la kamai tang 123 run bad shah pynkhyllem 7 wiket ha ki 20 over. U Wanz Mawroh u la ïoh ban khyrwit ïa ka shiteng spah da kaba ïoh 56 run na ki 55 bol bad u Sanjay Mandal u la ïoh 31 run na ki 31 bol. Katba u Pankaj Roy u la khur 4 wiket bad 2 wiket la khur da u Sameer Quereshi. Ïa ka nam ‘Player of the Match’ la ïoh da u Pankaj Roy.
