Chennai, Jymmang:
Ka National Investigation Agency (NIA) ha ka sngi Ba-ar ka la pynlong ïa ka jingleit khynra ha ki saw tylli ki jaka kiba don ha Tamil Nadu ha kaba ïadei bad ka jingjia jong ka jingleh ïa ki kam kiba long beaiñ jong ka seng Popular Front of India (PFI) kaba la shah ñiew beaiñ.
Ka kynhun NIA ka la kem ïa arngut ki briew. Kumba la ïathuh ka tyllong khubor, la ong ba ka kynhun NIA ka la kem ïa u Sadiq Ali, uba long u District Secretary jong ka SDPI jong ka Theni, bad u Mohammad Qaiser, uba long u President jong ka seng PFI jong ka thaiñ Madurai na Pazhani kaba don ha Dindigul distrik jong ka Tamil Nadu.
Ïa ka jingleit khynra la pynlong ha ki 6 tylli ki jaka kiba don ha ki distrik jong ka Madurai, Chennai, Dindigul bad Theni jong ka Tamil Nadu, kynthup ka jaka sah jong u Mohammad Qaiser.
Haduh mynta, ki la jan don 12 ngut ki dkhot jong ka seng PFI kiba la shahkem ha ka kynhun NIA naduh ba la buh jingmudui ha kaba ïadei bad ka jingjia naduh ba sdang jong u snem ba la lah.
“Ka mukotduma, kaba la don hapdeng ka jingtohkit naduh u Ïaïong jong u snem 2022, ka la pynpaw ba ka jingjia jong ka jingïasuhbuit ka la lah ban pynurlong da ka PFI na ka bynta ka jingthmu jong ki ban phiah kynhun. Ka la paw ruh ba ki jingïasuhbuit sniew ki long ban pyntroiñ ïa ki rukom pyntreikam ha ka liang ka synshar khadar jong ka jinglaitluid bad ka synshar paidbah ha India bad ban buh ne wanrah da ka jingsynshar jong ki heh nongïalam niam Muslim,” la ïathuh ka tyllong khubor.
