Shimla, Jymmang:
Ki la don baroh kumba 14 tylli ki surok, kynthup ïa ar tylli ki surok bah, kiba la shah khang na ka bynta ka jingïaid jong ki kali ha ha Himachal Pradesh hadien ba ka la don ka jinghap jong ka ïor ha kiba bun ki bynta, la ïathuh ki heh ba dei khmih ha ka Lah Sngi U Blei.
Ki surok ki kynthup ïa ka surok kaba jrong kaba don hapdeng ka North Portal jong ka Atal Tunnel shaduh Darcha (National Highway 3), na Darcha sha Shinkula shaduh Zanksar, na Koksar sha Losar (National Highway 5) bad na Tandi shaduh Kadhu Nullah.
Napdeng kine ki 14 tylli ki surok kiba la shah khang, 6 tylli ki dei kiba don ha Lahaul bad Spiti distrik, saw tylli ha Kullu bad kiwei pat kiba don ha ki bynta ba bun jong ka jylla, la ïathuh ka kynhun ba dei khmih.
Ki la don kumba 500 tylli ki kali kiba la sahkut hajan ka North Portal jong ka Atal Tunnel kaba don ha Rohtang Pass ha Manali.
Katba palat 300 tylli kiwei pat ki kali kiba la sahkut ki la leit sha ki jaka ba lait na ka jinghap jong ka ïor, kiwei pat ki dang don ha ka surok kaba dap da ka ïor.
Kine ruh kin sa shah pynkynriah sha kiwei pat ki jaka kiba lait na ka jingshah ktah na ka jinghap ïor.
Ki pulit ki la pynlong ïa ka jingleit khmih bniah ïa katei ka jaka bad ka jingpyntreikam ka la ïai bteng bad ki la bthah ruh ïa ki briew ba kim dei ban mih ne ïaid ha kitei ki jaka ba la shah ktah na ka jinghap ïor bad la bthah ruh ïa ki nongñiah kali ba ki dei ban pynduna ïa ka jingpynsted ïa ka kali khnang ba kan ym shah bret.
Katkum ka jingïathuh jong ka tnat ba dei khmih, la ong ba ka Gondla bad ka Keylong ki la ïoh ïa ka jinghap ïor kaba 9.2 bad 4 cm.
Ka Lahaul Spiti ha ryngkat kiwei pat ki jaka ki la ïoh ïa ka jinghap ïor kaba 5 haduh 10 cm, ha kaba kane ka la pynbtuit ïa ki surok na ka jingdap jong ka ïor.
