Washington, Jymmang:
Katkum ki kaiphod ba la ioh lum ha kane ka por, la ong ba u suba donkti ha ka jingsiat hapoh ka iew ‘Shopping Mall’ ha Texas, ha kaba 8 ngut ki la khlad ha katei ka jingjia, utei u briew u dei uba la shah pynmih noh na ka kam shipai jong ka United States ha u snem 2008. Kane ka long ruh tang hadien 3 bnai ba u la leit ban pyniasoh ialade sha ka tnat shipai.
U Mauricio Garcia, 33 snem ka rta, u la shah siat iap noh ha ki pulit ha ka Sngi Saitjaiñ hadien ka jingsiat hapoh ka jaka pynieng kali jong ka Allen Premium Outlets kaba don sha ka thaiñ North jong ka Dallas.
La ioh jingtip ba u Mauricio u dei uba la leit pyniasoh teng sha ka tnat shipai jong ka US ha u snem 2008 bad u la shah pynsangeh noh tang hadien 3 bnai bad u khlem lah shuh ruh wat tang ban pynkut ia ka por ai jinghikai kumba ju dei ka rukom.
Namarkata la ong ba um ju iadon bynta eiei shuh ha ka kam bad ka tnat shipai naduh katei ka por. Um pat ju shah pynngat duty shaei shaei bad um pat ju ioh pdiang ruh ia ki khusnam aiu- aiu ruh naduh katei ka por.
Hynrei, la ioh jingtip ruh ba u Gracia um don ia ka bor pyrkhat kaba biang bad u ju ialeh ruh ban tehlakam ia katei ka jingshitom kaba u don.
