Wan shakhmat ka skul St. Anthony’s ha ka risol Science & Commerce Stream ka HSSLC

Ha katei ka sngi la ïohi ruh ba na ka liang ki nonghikai bad ki khynnah pule katei ka skul ki la dap da ka jingkmen.

Shillong, Jymmang 09:

Ka skul St. Anthony’s Higher Secondary School, Shillong ka la wan biang shakhmat ha ka risol Higher Secondary School Leaving Certificate (HSSLC) ba la pynbna da ka Meghalaya Board of School Education (MBoSE) ha ka Sngi Ba-ar ka 9 tarik u Jymmang 2023 ha ka Science Stream bad ka Commerce Stream ha kane ka kynti kaba mynta.

          Ka skul St. Anthony’s ka la ïoh haduh 7 tylli ki kyrdan ha ka Science Stream, kata ha ka kyrdan kaba 3 ba la ïoh da ka Eshita Bhattacharjee kaba la ïoh 477 mark, ha ka kyrdan kaba 5 la ïoh da u Soumitra Jha uba la ïoh 460 mark, ha ka kyrdan kaba 7, ki don ar ngut kita u Sargam Datta bad ka Sharmin Khongsit kiba la ïoh mar 454 mark, ha ka kyrdan kaba 8 la ïoh da u Sangam Paul uba la ïoh 453 mark, ha ka kyrdan kaba 9 la ïoh da u Biswadeep Nath uba la ïoh 450 mark bad ha ka kyrdan kaba 10 la ïoh da ka Samjanai Synnah kaba la ïoh 446 mark.

          Katba ha ka Commerce Stream ruh ka la ïoh haduh 7 tylli ki kyrdan kata ha ka kyrdan kaba 2 la ïoh da u Akshat Poddar uba la ïoh 478 mark, ha ka kyrdan kaba 3 la ïoh da ka Satakshi Das bad ka Sneha Paul kiba la ïoh mar 463 mark, ha ka kyrdan kaba 5 la ïoh da u Deepak Sethia uba la ïoh 454 mark, ha ka kyrdan kaba 6 la ïoh da u Nengneiching uba la ïoh 453 mark, ha ka kyrdan kaba 7 la ïoh da ka Phibalamti Marweiñ kaba la ïoh 451 mark bad ha ka kyrdan kaba 9 la ïoh da u Kashish Sharma uba la ïoh 448 mark.

          Haba kren sha ki lad pathai hadien katto katne kynta ba la mih ka risol, u Phadar Anthony Kharkongor, u la ai ka jingkhublei kaba kyrpang ïa ki khynnah skul kiba la leh bha bad kiba la wanrah ka nam bad ka burom ïa ka jaka pule hi baroh kawei.

          “Sa shisien ka skul jong ngi ka la wan shakhmat duh ha kaba ki khynnah jong ngi ki la ïoh haduh 7 tylli ki kyrdan ha ka Science Stream bad ka Commerce Stream,” la ong u Phadar Anthony Kharkongor.

          U Phadar Anthony u la ong ba ka jingsngewnguh nyngkong eh ka leit sha U Blei Nongbuh Nongthaw ba sa shisien u la kyrkhu kyrdoh ïa ka skul bad kumjuh ruh ïa ki nonghikai, ïa ki khynnah skul bad ïa ki kmie ki kpa kiba la buddien ïa ki khun jong ki.

          U Phadar Anthony u la pynpaw ruh ka jingkmen kaba khraw ba ka skul miet jong katei ka jaka pule ka la lah ban leh bha ha ka kynti kaba mynta khamtam eh ha ka Commerce Stream kaba la lah ban leh bha wat la ka dei ka Batch kaba nyngkong.

          “Ka jingkhublei ka leit ruh sha ki nonghikai jong ka skul miet bad ïa baroh ki kmie ki kpa kiba la leh bha bad ngi ngeit skhem ba kane ka jingsdang na ka bynta kine ki khynnah bad ngi dang ïai ai mynsiem bad ïai kitbok kitriang ïa ki ba kin dang ïai tur shakhmat ha ki jingpynkhreh ba kin jop ha ka lawei kaba ma ki, ki la don ïa kata ka thong bad ba kin ïoh kano kano ka kam kaba bit kaba biang,” la ong u Phadar Anthony.

          Ha katei ka sngi la ïohi ruh ba na ka liang ki nonghikai bad ki khynnah pule katei ka skul ki la dap da ka jingkmen. Kaba kham khring shuh shuh ha katei ka sngi ka long ba la ïohi ba ki khynnah pule jong katei ka skul ki la ïashad bad kynhoi da ka jingrwai jong u Prah.