Shillong, Jymmang 10:
Ki kynthei ki la mih kham bun ha ka Sngi Balang ban jied ïa u MLA bathymmai ka Sohïong konstitwensi. Katkum ka jingkheiñ ba la ïohlum, ka jingwan ki nongthep ‘vote’ ka la long haduh 91.92 per cent na ki 34,783 ngut ki nongthep ‘vote’ kiba don ha kane ka konstitwensi.
Ka shlem treikam jong u Chief Electoral Officer (CEO) ka jylla ka la pyntip ba ka jingdon ki nongthep ‘vote’ kiba dei ki kynthei kiba la pyndep ïa ka kamram ban jied MLA ka la kot sha ka 93.48 per cent katba ka jingwan ki nongthep ‘vote’ kiba dei ki shynrang ka long 90.3 per cent.
Ki don hynriew ngut ki kyrtong ha kane ka ilekshon kiba kynthup ïa u Bah Samlin Malngiang na ka NPP, u Bah Synshar Lyngdoh na ka UDP, u Bah S Osborne Kharjana na ka Congress, u Bah Sandondor Ryntathiang na ka HSPDP, u Bah Stodingstar Thabah na ka TMC bad u Bah Serap Eric Kharbuki na ka BJP.
Haba kren sha ki lad pathai khubor, u CEO, Bah F.R Kharkongor u la pyntip ba kam shym la don satia kano-kano ka huri-hura ne ka jingthut ha ka por thep ‘vote’ mynta ka sngi. Ha Sohïong konstitwensi, ki don 63 tylli ki jaka thep ‘vote’ lane ki ‘Polling Station’.
U Bah Kharkongor u la kdew ruh ba ka jingwan ki nongthep ‘vote’ mynta ka kynti ka kham bun haba ïanujor bad ka ilekshon ha u snem 2018 namar ha kato ka por ka long 90.40 per cent.
Nalorkata, u la ong ba kam shym la don satia ka jingthut ha ki kor thep ‘vote’ lane ki EVM lait noh tang ha ka por mynstep katba dang pynïaid ïa ka ‘Mock Poll’ tangba la lah ban bujli noh ïa kita ki kor kiba thut da kiwei pat.
U la ïathuh ruh ba ha ka jaka thep ‘vote’ ha Nongpathaw, ka la don ka jingthung ïa ki tynrai dieng da ki paidbah kiba la wan ban thep ‘vote’ bad kiba kham bun kiba la ïashim bynta ha kane ki dei ki samla kiba dang shu ïoh thep ‘vote’ ha ka sien banyngkong ha ka jingim jong ki.
Ka jingñiew ïa ki ‘vote’ kan long ha ka 13 tarik Jymmang ha State Central Library, Shillong.
