Shillong, Jymmang 10
U MDC ka Khasi Hills Autonomous District Council (KHADC), u Bah Bindo M. Lanong, u la thoh da ka shithi sha u Director General (DG) ka tnat Border Security Force (BSF) halor ka jingshah siat ïap jong u Bah Roning Nongkynrih ha ka miet jong ka 5 tarik Jymmang.
Ha kane ka shithi, u Bah Bindo u la pynpaw ïa ka jingsngew lyngngoh ba kumno kita ki BSF kiba la siat ïap ïa u Bah Roning ki la wan rung sha ki jaka sah paidbah ha ka thaiñ Mawshun-Pomshutia ha ka por mynmiet haba ka jaka khappud ha Dawki ka dang jngai sa kumba 9 km eiei.
“Ka kamram jong ki BSF ka long ban pahara ha ki jaka ba don hajan u pud u sam jong ka India bad Bangladesh. Nalorkata, katei ka jaka ba la jia ka jingshah siat ïap ka dang hap hapoh ka jingpeit jong ki pulit ka thanat Pynursla. Kumno yn lah ban ong ba kaei kaba la jia ka ïadon bynta bad ka kam khaïi be-aiñ ha khappud,” la kylli u Bah Bindo.
Nalorkata, u la ong ba ka jingshah siat ïap jong u Bah Roning uba long u kpa jong ar ngut ki khun kiba dang rit bad u kurim jong ka longkmie ka bym pat don kam don jam, ka la pynpaw ïa ka jingbym bit bym biang jong ki shipai BSF.
U la kynnoh ruh ba ha kiba bun ki khep, ki BSF kim ju don satia ha ki jaka ba ki dei ban pahara naba ki ju leit wad kyiad bad kiwei pat ki kam sngewbha kumba la ju kdew da ki nongshong shnong pyrshah ïa kine ki shipai.
“Hynrei, ha kane ka kynti, ki la shah bat beit sbak naba ka la don ka jingïap briew namar ka jingsiat ka jong ki, bad kane ka dei ka jingpynkheiñ ïa ka kyndon 302 bad kiwei jong ka Indian Penal Code. Ha ka jingshisha, kitei ki shipai BSF ki la dei ban siat kuli sha suiñ lane ïa ka shaka jong ka trok bad lada ki la leh kumta, kan jin da la pyllait im ïa utei u samla uba dei u nongkamai jong ka ïing ka sem jong u,” la ong u Bah Bindo.
Ha kajuh ka por, u la ong ba ki pulit ka jylla ki dei ban shimti ïa ka jingtohkit halor katei ka jingjia naba ka la jia ha ka jaka paidbah.
Nalorkata, u Bah Bindo u la kyntu ïa u DG ki BSF ba ka tnat ka dei ban siew ïa ka bailutksan sha ka ïing ka sem jong utei u samla uba la khlad.
