Nongpoh, Jymmang 10:
Sa tang kumba katto katne por shwa ka jingsdang jong ka jingpynbeit biang ïa u pud u sam hapdeng ka jylla Meghalaya bad Assam ha ka wat ba ar, u MLA ka Jirang, u Bah Sosthenes Sohtun ha ka Sngi Balang u la leit ban ïuh kjat sha ka shnong Nongwah Mawtamur ban kynduh ïa ki nongïalam shnong bad ruh ïa ki paidbah nongshong shnong ban tip ïa ka sur ka jong ki bad ruh khamtam ïa ki jingeh ba ki mad.
Kum ban shu pyntip ka shnong Nongwah Mawtamur kaba hap ha ki thaiñ khappud jong ka Jirang konstitwensi ha Ri Bhoi District, ka dei kawei na ki shnong kaba hap hapdeng ka jingïakajia pud. Kane ka shnong ka don ha ka wat bar ar jong ka jingpynbeit pud hapdeng ka Meghalaya bad ka Assam.
Na ka liang ki paidbah nongshong shnong na ka por sha ka por ki la pynpaw ïa ka jingeh halor ka jingwan kyntur pud jong ka jylla Assam bad ruh ïa ka jingsheptieng ba ïoh lehse kane ka shnong kan hap noh sha ka Assam. Ha kane ka jingpynbeit ka ban sa long ha kine ki sngi ki ban wan, naba kumba la long naduh mynshwa, ki nongshong shnong ki kwah ba kin don beit bad ka jylla Meghalaya.
Ha ka jingkynduh bad u Bah Sosthenes Sohtun, na ka liang ki nongïalam shnong bad ki ’riew paidbah ki la pynpaw ba ka jingpynbeit ïa u pud u sam ha kane ka wat ba ar ha katei ka shnong kam dei satia ban long da ka jingrah kti, hynrei ban pynthikna ïa ka jinglong trai da ki kot ki sla.
U Bah Dwen Lyngdoh bad u Bah Useful Lakhmie kiba dei ki ’riew rangbah jong ka shnong, ki la kyntu ruh ïa u MLA ba u dei ban shimkhia halor kane ka bynta ban pynthikna ba ka shnong Nongwah Mawtamur ka dei ban hap beit sha ka jylla Meghalaya kumba la ju long naduh mynshwa. Ha kajuh ka por ki la kyrpad ruh ba un ïarap ban pynbiang ïa ki kam pynroi ha katei ka shnong khappud, khamtam ha kaba ïadei bad ka surok, naba kumba long mynta, ka jingbym biang jong ka surok ka dei kawei na ki jingeh kaba ki paidbah ki kynduh na ka por sha ka por ha ka leit ka wan.
Katba na ka liang u Bah Sosthenes Sohtun haba ai jingkren, u la kular sha ki paidbah nongshong shnong ba un shimkhia halor kane ka bynta ban ïakren bad ka sorkar jylla. Ha kajuh ka por u la kyntu ruh ïa ki seng bapher bapher kumjuh ïa ki seng saiñ hima ba kim dei ban shim kabu politik halor kane ka kam pynbeit pud hapoh kane ka thaiñ, hynrei ba kin ai ïa ka jingïatrei lang bad ka sorkar.
Nangta ha kajuh ka por u la kyntu ruh ïa ki nongshong shnong ba kin pynbiang ïa ki kot ki sla jong ki jaka puta ba kin pynpoi sha ka Regional Committee kaba la thung da ka sorkar jylla.
