New Delhi, Jymmang:
Ka Supreme Court ha ka Lah Sngi U Blei mynta ka taiew ka la bthah ïa ka Sorkar Pdeng bad ïa ka Sorkar Manipur ba ki dei ban shim ïa ki sienjam kiba kyrpang ban pynbiang ïa ki jingïada bad kumjuh ruh ïa ki lad jingïarap na ka bynta kito ki nongshong shnong ka jylla Manipur kiba la mad bad ïakynduh ïa ki jingeh na ka daw jong ka jingmih ki jingïakajia bad jingumsnam kiba jur kiba la jia ha ka jylla Manipur naduh ka 3 tarik mynta u bnai.
Ka miej jong ka Supreme Court hapoh ka jingïalam jong u Chief Justice D Y Chandrachud da kaba shim ïa katei ka jingïakajia kum kawei na ki jingjia kaba la ktah ïa ka hok longbriew manbriew jong kiba bun, ka la ban khia halor ka mat kaba ïadei bad ki jingpynkhreh ban pynbiang ïa ki lad jingïarap na ka bynta kitei ki paid Manipur kiba la hap ban mih noh na la ki jong ki ïing ki sem ban leit sah sha ki shlem treikam jong ki bor pahara. Na ka liang ka Suprem Court ka la bthah ïa ka sorkar ba kan pynbiang ïa ki lad jingïarap kum ha ka liang ka bam ka dih, ki reshon bad kumjuh ruh ha ka liang ki dawai dashin.
Na ka liang ka Supreme Court ka la pyntip ruh ba ka dap da ka jingsngewkhia kaba jur halor ka jingïakynat bad jingkulmar kaba la jia ha ka jylla Manipur kaba la wanrah ruh ïa ka jingduh ïa ki mynsiem kiba kordor bad kumjuh ruh ïa ki jingdon jingem jong ka jylla.
Ka Miej jong ka ïing kashari kaba kynthup ruh ïa u Justice P S Narasimha bad Justice J B Pardiwala, ka la bthah ba ka Sorkar ka dei ban shim ïa ki lad ki lynti kiba kyrpang ha ki liang kiba ïadei bad ka jingpynbiang ïa ki jaka sah na ka bynta ki lanot bad kumjuh ruh na ka bynta ban pynbiang ïa ki lad jingïada ïa ki jaka mane Blei.
Kat kum ka jingïathuh jong u Solicitor General Tushar Mehta u la pyntip ba na ka liang ka Sorkar ka la shim da ki lad ki lynti kiba kyrpang eh ban tehlakam bad tem ïa kitei ki jingjia kiba la jia ha ka jylla Manipur. U la ïathuh ba na ka liang ka sorkar ka la phah haduh 52 pyrton ki kynhun shipai, nalor ki shipai Assam Rifles bad Indian Army ban leit pahara ha ki thaiñ bapher bapher jong ka jylla Manipur. U la pyntip shuh shuh ba ïa ki Flag Marche la leit ban pynlong ha ki thaiñ kiba kham shongsyier bad la pynlong ruh ïa bun tylli ki jingïalang syllok kiba ïadei bad katei ka jingjia.
Kat kum ki jingïoh lum jingtip la ïathuh ba na ka liang ka Supreme Court ka la pynmih ïa katei ka hukum hadien ka jingkhmih bniah ïa ki 2 tylli ki PIL kiba ïadei halor ka jinglong jingman jong ka jylla Manipur. Ïa ki 2 tylli ki PIL la leit ban pynrung da u MLA ka BJP bad ïa kawei pat la leit ban pynrung da kawei ka kynhun riewlum.
