Nongstoiñ, Jymmang 10:
Hadien ba la mih ka jingpyrshah na ki paidbah bad ki kynhun seng halor ka jingksam marpoh khyndew ha kawei na ki jaka ha ka shnong Mawlangria, Mawiawtep jong ka thaiñ Rambrai da kaba la kam bad kynnoh ruh ba katei ka jingksam marpoh khyndew ka la pynkylla rong bad pynsniew ïa ka umbam umdih, ha ka sngi Balang ki bor district ka West Khasi Hills hapoh ka jingïalam jong u Bah R Kharkongor, EAC ka WKH ryngkat ka jingsynranlang u Circle Inspector ka Nongstoiñ u GK Sangma ki la hiar ban pynlong ïa ka jingjurip.
Katei ka jaka ksam marpoh khyndew ka dei kaba la pyntrei da u Bah Macdonald Lyngdoh uba dei ruh u trai khyndew ha ka shnong Mawlangria, bad la ïathuh ba utei u marpoh khyndew ïa kaba la ksam ha katei ka jaka u dei u ‘Iron Ore’.
Na ka liang ki bor District ki la pynpaw ba ki la dep ban bthah ïa ki nongpyntrei ba kin pynsangeh shuwa ïa ka jingtrei tat haduh ba kin da lah ban pyntikna ba kan ym don kano kano ka jingktah ïa ka umbam umdih bad kan ym don ka jingpyntuid ïa ki jaboh. Hynrei, na ka liang ki paidbah nongshong shnong jong ka thaiñ kiba la poi lang ha katei ka jaka, ki la pynpaw ïa ka jjngpyrshah ïa katei ka jingksam marpoh khyndew ha kaba ki la pynpaw markhmat bad ki bor District ba kim kwah shuh ban ailad ba katei ka jingpyntrei ïa katei ka kam kan dang ïaid shakhmat hynrei dei ban sangeh noh shi syndon.
U Bah Macdonald Lyngdoh uba dei u trai bad uba la pyntrei ïa katei ka jaka ksam marpoh kyndew u la kam ba kam don kum kata jingktah ïa ka umbam umdih kumba la kynnoh da ki nongshong shnong. U la kular ruh ba un rah ïa ka um ban phah peit bniah khnang ban lap ïa ka jingshisha. Nalor kata, u la kular ruh ban ker bha noh ïa ki katto katne ki bynta khnang ba ka um kaba mih na katei ka jaka ksam kam dei ban poi ne ktah ïa ki tyllong um.
