Shillong, Jymmang 10:
Ka Khasi Hills Autonomous District Council (KHADC) ka la shim ïa ka rai ba nangne shakhmat ka kyntien ‘ot kilo’ hapoh ki ïew ba hap hapoh u pud u sam jong ka council kam dei ban mih shuh na ka bynta ka bit ka biang jong ki nongrep.
Kane ka jingshim rai jong ka KHADC ka la long hadien ba na ka liang ka Executive Committee ka KHADC ha ka Sngi Balang ka la khot ïa ka jingïalang ba kyrpang ban ïatai ïathir halor ka jingeh ki nongrep ba ïakynduh bad ruh halor ka jingshah ot kilo ki mar rep.
Ha kane ka jingïalang ba la pynlong ha council, nalor u CEM bad ki EM ka KHADC, la ïadon lang ruh u Syiem ka Hima Mylliem, ki Myntri, ki nongïalam ka Hills Farmer’s Union, ki nongkhaïi ba don ha ïewduh.
U CEM, Bah Titosstarwell Chyne haba kren sha ki lad pathai khubor hadien ba la wai ka jingïalang, u la ong ba ka jingkhot ïakynduh ïa kitei ki kynhun kam dei kaba nyngkong, hynrei naduh u snem 2018 ter ter la don bun ki jingïakynduh ban ïakren halor ki jingeh ki nongrep bad khamtam ka kam ba ïadei bad ka jingshah ot kilo ha Ïewduh, kaba ki nongrep na ka por sha ka por ki ju ai ka jingujor ba don kata ka jingshah ot kilo.
U la pyntip ba halor kane ka jingeh, ka EC barim ka la thaw ka komiti ba kyrpang halor kane ka bynta ba la khlieh da u Bah Pynïaid S Syiem kum u MDC bad naduh kane ka por bad kumjuh ruh lyngba ka ‘jingpynbna’ ba la pynmih da ka Dorbar ka Hima Mylliem halor ka jingot kilo, ym ju ïoh shuh kano kano ka jingujor ban don kata ka ot kilo. Hynrei wat la katta la sngewthuh ba ki jingeh ki lah ban don hangne hangtai bad kumta dei halor ba la khot kane ka jingïalang.
Nalor kata, u CEM u la ïathuh ba kane ka jingïalang ka la shim ïa ka rai ba naduh kane ka sngi yn nym dei shuh ban dang don kano kano ka jingot kilo ha Ïewduh ïa kino kino ki mar-rep bad ruh ba ki nongkhaïi ki dei ban bud ryntih ruh ïa ka hukum kaba la dep ban ai da ka Hima Mylliem, kaba ong ba ki nongthied ne nongkhaïi ki dei ban thew tang ïa ki khoh, kriah ne byrni hadien ba la dep ban pyllait ïa ki mar-rep, khnang ba kan long biang lang ïa baroh ar liang.
Ha kajuh ka por, u CEM u la pyntip ba la ïatai ruh halor ka jingeh jong ki nongkhaïi kaba ki ïakynduh, bad ha kaba la rai ba na ka liang ki nongrep ruh ki dei ban theh ne sei lut ïa ki mar-rep jong ki, khnang ban nym don ka jingleh thok leh shukor da kaba thep lang da ki mar pyut.
Nangta u CEM u la pyntip ruh ba ka jingïalang ka la shim ruh ka rai ban pynmih ka jingpynbna ‘notification’ da ka KHADC ba ha baroh ki ïew kiba don hapoh u pud u sam jong ka council, khnang ba kan nym don shuh ka jingot kilo na ki mar-rep.
Ban lah ban peit ïa kane ka jingeh, la rai ruh ban don ka komiti ba kyrpang ban khlieh da u CEM ryngkat ka jingdon lang ki EM, ki nongïalam ka HFU, ki nongkhaïi lem bad ki Khlieh Nongsynshar.
Ha kawei pat ka liang, u CEM u la pyntip ruh ba ka EM ka tnat Market ka Kong Grace Mary Kharpuri, EM Trade Bah Rangkynsai Kharbuki lem bad kiwei kiwei ki MDC bad ka Hima Mylliem, ka HFU bad ki nongkhaïi na Ïewduh, kin hiar jurip ïa ka Ïewduh lashai ka sngi palei ha ka por mynstep. Ka kane ka jingleit jurip ym tang ban peit ïa ka jingot kilo ïa ki mar-rep, hynrei ruh ban peit ïa kiwei ki kam pynbit pynbiang bad pynbha ïa ka Ïewduh, ka jingpyntrei ha ka ïew die lang bad kiwei kiwei.
