Boko, Jymmang:
Ki bor pulit jong ka jylla Assam ha ka 8 tarik mynta u bnai ki la pyntip ba ki la don haduh 5 ngut ki briew kiba la duh ei ïa la ki jong ki mynsiem bad 6 ngut kiwei pat kiba la ïoh ïa ki jingmynsaw na ki 3 tylli ki jingjia ïatakhuh kali kiba la jia ha kylleng ka thaiñ Boko.
Kat kum ka jingïathuh jong ki bor pulit, ki la pyntip ba kawei na kitei ki jingjia ïatakhuh kali ka la jia ha ka surok NH-17 marjan bad ka shnong Chokabaha, kawei pat hajan ka Singra Reserve Forest ha ka miet jong ka Sngi U Blei ba la dep, bad kawei pat kaba la jia ha ka miet jong ka Sngi U Blei ba la dep ha ka shnong Borpara.
Ki la pyntip ba ka por kumba 9 PM ha ka Sngi Saitjaiñ ba la dep, 3 ngut ki riew paidbah ki la shah tynrah ha kawei ka kali ha ka shnong Chokabaha. Na katei ka jingjia la ïathuh ba uwei u samla u ba la tip kyrteng kum u Dayal Rabha na ka shnong Mouman u la khlad hashen; katba 2 ngut kiwei pat ki la ïoh ïa ki jingmynsaw kiba jur ïa kiba la leit ban rah sumar noh sha Guwahati Medical College & Hospital. Ki 2 ngut kiba la mynsaw kiba jur ki kynthup ïa u Return Rabha bad u Krishna Kanta Rabha.
Ha kawei ka jingjia kaba la jia hajan ka Singra Reserve Forest, kawei ka kali Alto (AS 01 EE 6267) ka la leit ban tynrah ïa uwei u dieng bad na katei ka jingjia la ïathuh ba ki la don haduh 3 ngut ki briew kiba la khlad hashen bad 3 ngut kiwei pat kiba la ïoh ïa ki jingmynsaw. Kat kum ki jingïoh lum khubor la ïathuh ba kitei ki briew ki dei kiba dang wan na kawei ka ïïng khawai shong kurim ha ka shnong Raipara.
Sa ha kawei pat ka jingjia kaba la jia hajan ka shnong Borpara, la ïathuh ba kawei ka thuk thuk (AS 25T 6944) ka la leit ban tynrah ïa kawei ka trok bad na katei ka jingjia u nongñiah jong katei ka thuk thuk u la khlad hashen katba u paralok jong u pat u la ïoh ïa ki jingmynsaw ba jur. U samla u ba la khlad na katei ka jingjia u dei u ba la tip kyrteng kum u Shiva Das (22 snem ka rta) katba u paralok u ba la ïoh ïa ki jingmynsaw u dei u ba la tip kyrteng kum u Sadananda Das (22 snem ka rta). Baroh 2 ngut kitei ki samla ki dei ki nongshong shnong ka thaiñ Kahibama – ka thaiñ kaba hap hapoh ka jingkhmih jong ki bor pulit ka Boko Police Station. Ïa u samla u ba la ïoh ïa ki jingmynsaw la leit ban pynkit noh sha Boko Hospital bad hadien pat la leit ban pynkynriah sha GMCH na ka bynta ki lad jingsumar kiba kham janai.
