Kolkata, Jymmang:
Ki shipai khappud Border Security Force (BSF) ha ka Lah Sngi U Blei ki la kem ïa arngut ki briew kiba la pyrshang ban khaïi ïa 52 tylli ki ksiar lyngkhot kiba la kot sha ka T. 4.24 klur ha ki bynta jong ka khappud Indo-Bangla.
Une u nongkhaïi tuh u la shahkem ha Integrated Check Post (ICP) kaba don ha Petrapole ha North 24 Parganas distrik.
Ki pulit jong ka kynhun ICP Petrapole ki la ïoh jingtip shaphang ka jingdon jong u briew uba la khaïi ksiar na Bangladesh sha India lyngba ka bos Royal Friendship International Passenger Bus.
Kane ka bos ka la ïaid na Agartala lyngba ka Dhaka sha Kolkata. Haba kane ka bos ka ka poi ha ICP Petrapole, ki pulit ki la pynsangeh ïa ka bad pynlong ïa ka jingkhmih bniah.
Ka kynhun jong ki shipai ka tnat BSF ka la pynlong ïa ka jingkhmih bniah bad lap ïa 52 tylli ki lyngkhot ksiar kiba don ïa ka jingkhia kaba 6,950 grams ha u Pipe ba thylli ba la buh hajan ka jaka thep umphniang.
U nongñiah bos ba la tip kyrteng kum u Mustafa, bad u nongbud jong u u Matur Rahman Akanda, kiba dei ki nongshong shnong jong ka Bangladesh, ki la shahkem na katei ka jaka.
Kumba la antad la ong ba kane ka ksiar kaba la shah kurup ka shongdor kumba T. 4,23,64,882.
Ïa kine ki nongkhaïi kiba la shahkem bad ïa ka ksiar ba la ïoh ban kurup la aiti sha ka Directorate of Revenue Intelligence (DRI), Kolkata.
U Director-General jong ka tnat BSF u la ai ka jingïaroh ïa ki shipai ka tnat kiba la wanrah ïa ka jingjop bad pynbna ban ai khusnam da ka pisa na ka bynta jong ki halor kane ka kam ba ki la leh.
Kum shi bynta ban lah ban khanglad ïa ki kam khaïi tuh na ki bynta khappud, ki heh shipai ka tnat BSF ki la buh ka jingkyrpad ïa ki briew kiba shong basah ha ki thaiñ khappud ba ki dei ban ai khubor lada ki ïoh jingtip ba don ki nongkhaïi tuh ïa ka ksiar lyngba ka ‘Seema Saathi’ helpline number 14419.
Yn sa ai khusnam da ka pisa sha kino kino ki briew kiba lah ban ai jingtip halor kane bad ban buhrieh ne ym pynbna paidbah shaphang jong ki, la ong ki heh ka tnat BSF.
