Shillong, Jymmang 10:
U Lat ka Jylla, u Phagu Chauhan, ha ka Sngi Balang u la leit jngoh ïa ka Dawki ha West Jaiñtia Hills.
Kum shi bynta jong katei ka jingleit jngoh, u la leit peit ruh ïa ka Land Port Authority of India (LPAI) ba dang shu plie bad ka Integrated Check Post (ICP), Dawki ha kaba u lum ruh ïa ka jingïalang bad ki ophisar na ki tnad treikam ka Sorkar Pdeng kum ka Land Port Authority of India (LPAI), BSF, Customs bad ophisar ki bor distrik ba kynthup ïa u Superintendent of Police, PD-DRDA, SDO (Civil) ka Amlarem bad Pynursla Civil Sub Division lem bad ki khlieh nongsynshar jong ki shnong ba marjan.
Ha katei ka jingïalang, u Lat u la ïoh jingshai halor ki bynta bapher-bapher jong ka Integrated Check Post ha Dawki, ka kamram bad ka jingkitkhlieh jong ka tnad Customs bad Central Excise kumjuh ka jingpyntreikam ïa ki skhim bapher-bapher kum ka PMAY, MGNRERS, SSA, PM-POSHAN, National Health Mission, PMGSY, lem bad kiwei-kiwei da ki tnad treikam bapher-bapher.
Na ka liang u Superintendent of Police, West Jaiñtia Hills u la pynsngew ruh sha u halor ka jinglong-jingman ka shong suk shong shngaiñ hapoh ka thaiñ.
U Lat u la ïakren bad ki Rangbah Shnong bad kylli halor ki jingeh bad ki kam pynroi ha ka thaiñ jong ki. Ki Rangbah Shnong lem bad kiwei-kiwei ki ophisar u la pynsngew sha u Lat halor ka jingbym biang ki lad pynïasoh ‘mobile’ ha ki thaiñ khappud bad kyrpad ruh ban pynkloi haba ïadei bad ka projek surok Shillong-Dawki.
U la ïakren sani bha halor ki mat ba ïadei bad ka jingkyntiew ïa ka thaiñ Dawki bad bthah ïa ki ophisar ban pynleit jingmut na bynta ka bha ka miat jong ki paidbah.
Nalor kane, kum shi bynta ban pynkhlaiñ ïa ka jingïadei hapdeng ka India- Bangladesh, u Lat u la leit jngoh ïa ka Indo- Bangladesh Maitri Dwar ha Tamabil Border Check Post ban ïakren bad ki ophisar ka Bangladesh Border Guard, ha kaba u la ai jingbam ruh sha ki kum ka dak jong ka jingleh bha.
Shuh shuh u Lat hadien kane u la leit jngoh sa ïa ka Border Out Post (BOP) jong ka 4th Battalion Border Security Force (BSF) ha Dawki, ha kaba u Pradeep Kumar, IPS, Inspector General ka BSF HQ Shillong Frontier u la batai sha u halor ki sienjam ba la shim na bynta ka shong suk shong shngaiñ hapoh ka thaiñ.
Khatduh eh, u Lat u la leit jngoh ïa ka Wah Umngot – ka jaka jngoh kai jong ka Jylla. Ha kane ka sngi ïa u Lat la synran lang da u Commissioner & Secretary, Dr. B. D. R. Tiwari, IAS lem bad kiwei-kiwei.
