Shillong, Jymmang 10:
Ki ar ngut ki kyrtong jong ki seng saiñ pyrthei kiba don hapdeng ka jingïakhun ha kane ka ilekshon MLA ha Sohïong konstitwensi, kata u Bah Samlin Malngiang kum u kyrtong ka National People’s Party (NPP) bad u Bah Synshar Lyngdoh kum u kyrtong ka United Democratic Party (UDP) ki la ïa kob mar kylliang ban pynpaw ba ki sngew khlaiñ hadien ba ki paidbah ki la dep thep ïa la ka ‘vote’.
Kane ka jingpynpaw jong kine ar ngut ki kyrtong ka dei hadien ba ki la leit jngoh ïa ki nongthep ‘vote’ ha man ki Polling Station ha Sohïong konstitwensi kaba la long ha ka 10 tarik Jymmang, 2023.
Haba ïakren bad u Bah Samlin kyrtong ka NPP, u la ong hadien ba u la wan jngoh ïa ki Polling Station ki don ki jaka kiba la khlaiñ ka seng NPP, hynrei un sa peit ynda la ñiew ïa ka ‘vote’.
U la ong ba ki don 44 tylli ki Polling Station bad ki don ki jaka ba ka NPP ka khlaiñ bha bad don ki jaka ba duna khyndiat. Hynrei, ka jingïakhun ka long beit hapdeng ka NPP bad UDP, tangba ym lah ban kheiñ sting ïa u kyrtong ka Congress haduh katno ki lah ban tan ‘vote’.
“Ha ka por ba ïakhun bad u Bah HDR Lyngdoh ka ïapher bad mynta u Bah Synshar Lyngdoh, namar u Bah Synshar tang ïa ki nongkitkam lajong ruh um pat ithuh bha namar u dang thymmai” u la ong.
Katba na ka liang u Bah Synshar Lyngdoh kyrtong ka UDP, u la ong ba shisien ba u kyrtong u la sngewskhem ki paidbah ruh ki la sngewskhem lypa.
U la ïathuh ba ki don haduh 44 tylli ki Polling Station bad 38 tylli ki dei kiba la khlaiñ ka UDP.
Shuh shuh u la pynpaw ba ka jingieid ki paidbah ïa u Bah HDR Lyngdoh ka la don lypa bad namar kata, ka jingïakhun mynta ka long beit na ka sur jong ki paidbah.
