Aizawl, Jymmang:
Ki bor sorkar ka tnat Kam Pohïing jong ka jylla Mizoram ha ki khyndiat sngi kiba la leit noh ki la pyntip ba ki la don palat 2,000 ngut ki nongshong shnong na ka jylla Manipur kiba la wan ban rieh tngen ha ka Mizoram ban lait na ki kam ïakajia bad ïaumsnam kiba la jia ha ka jylla Manipur naduh ka 3 tarik mynta u bnai.
Kat kum ka jingïathuh jong u Commissioner & Secretary ka tnat Kam Pohïing jong ka jylla Mizoram – H Lalengmawia u la pyntip ba ki la don haduh 2056 ngut ki nong Manipur kiba la wan ban rieh tngen ha ki thaiñ khappud bapher bapher jong ka jylla Mizoram.
U Lalengmawia u la pyntip shuh shuh ba ka thaiñ Saitual district kaba dei ka thaiñ kaba don markhap bad ka jylla Manipur ka dei ka thaiñ kaba don bun eh ki nong Manipur kiba la wan ban rieh tngen (827 ngut), bud sa ka thaiñ Kolasib District (757 ngut).
U la ïathuh shuh shuh ba ki la don haduh 402 ngut kiba la leit ban rieh tngen ha Aizawl district, 59 ngut ha ka thaiñ Champhai district bad 7 ngut ha ka thaiñ Khawzawl district.
Na ka liang u heh sorkar u la pyntip shuh shuh ba ki paid riewlum Zo (Mizo) ki la pynbiang ïa ki jaka shong jaka sah na ka bynta kitei ki paid Manipur bad kumjuh ruh na ka liang ka Sorkar Jylla ka la shim ïa ki sienjam ban pynbiang ïa kiwei kiwei ki jingdonkam.
Kat kum ka jingïathuh jong u Lalengmawia, u la pyntip ba ha ka Lah Sngi U Blei mynta ka taiew, ka sorkar jylla ka la lah ruh ban leit shaw ïa 86 ngut ki nongshong shnong ka jylla kiba la dahkut ha ka nongbah Imphal; 34 ngut kiba la wanpoi ha ka nongbah Aizawl da ka bus hadien ba ki la hiar ha kad liengsuiñ Guwahati bad 52 ngut kiwei pat kiba la kiew da ka liengsuiñ na Imphal sha Kolkata.
Na ka liang u heh sorkar u la pyntip shuh shuh ba ka Sorkar Jylla ka la shim da ki sienjam kiba kyrpang ban leit shaw sa ïa ki 68 ngut ki nongshong shnong ka jylla kiba dang sahkut ha Manipur.
U la pyntip ba ha ka Lah Sngi u Blei, ki la don ruh haduh 45 ngut ki nongshong shnong ka jylla (khambun ki samla pule) kiba ka sorkar ka la leit shaw na ka thaiñ Imphal bad Churachandpur.
