Karachi, Jymmang:
Na ka liang jong ki heh ki hain bad ki nongkitkam ba ha khmat eh jong ka Pakistan Cricket Board (PCB) ki pynpaw mynta ia ka jingpyrshah ha kaba iadei bad ka jingpynkynriah noh ia ka lympung ialehkai kriket jong u snem ba mynta ka Asia Cup na ka ri Pakistan sha Sri Lanka. Ym tang katta, hynrei ka la byrngem ruh ban ym shim bynta ne phah kynhun ialehkai sha katei ka lympung ialehkai lada ia ka jingkyrpad-kyrpon jong ka synjuk ym shym la pdiang da ka Asian Cricket Council ha kaba iadei bad katei ka jingpyrshah ka jong ka halor katei ka nongrim.
Nalor kata, ka khubor ka iathuh ruh ba na ka liang u khlieh nongpyniaid jong katei ka synjuk u Najam Sethi u la dep ban iakynduh bad ki heh ki hain jong ka Asian Cricket Council ha Dubai bad uba lah pynpaw ia ka jingbym pdiang ka jong u ha kaba iadei bad katei ka sienjam ba la shim rai da ka synjuk baroh kawei da kaba rah noh ia ka sha ka ri Sri Lanka ha ka jaka ba dei ban pynlong beit ha UAE. Shuh shuh u lah banjur ruh ba ia ka ACC ba kadei ban pdiang ruh ia ka jingpynthymmai mynta jong ka Pakistan ia ka Hybrid Model Proposal Schedule ka jong ka na ka bynta katei ka lympung bad lada baroh bad bun na ki dkhot ki kwah ban don ka lympung shawei pat, kadei ban long ha UAE kumba lah dep ban pynlong ia ka lympung ha u snem 2018 bad 2022.
U Sethi u lah kyntait ruh ia ka jingpynpaw jong ka BCCI ha kaba iadei bad ka jingkyrshan jong ka sha ka ACC ba ka ri UAE kan long ka ri ka ban shit tam na ka bynta ban pynlong ia ki jingialehkai ka lympung ha katei ka ri ha u bnai Nailur da kaba pynpaw ruh ba ka BCCI ka lah dep ban pynlong ia ka lympung ialehkai jong ka; ka IPL ha ka ri UAE ha u bnai Nailur haduh Naiwieng ha u snem 2020.
Ka tyllong khubor ka iathuh ruh ba ka PCB ka dap da ka jingkyndit kaba khraw ban shem ba ka SLC (Sri Lank Cricket Board) da ka jingioh jingkyrshan jong ka nadien na ka BCCI ka lah dep ban pynpaw sha ka ACC ia ka jingkwah jong ka ban pynlong ia ka lympung ialehkai mynta u snem. Ka long ruh ka jingkyndit kaba khraw ban iohsngew mynta ha kaba dangshen ha ka jingialang ba lah dep ban long jong ka ACC ha u bnai Rymphang mynta u snem, ka ri Pakistan, Bangladesh, Afghanistan ki lah dep ban kyntait ia ka jingtyrwa jong ka ri Sri Lanka bad ia kaba lah dep ruh ban mynjur ba ka Pakistan kan iaisah kum ka ri ka ban pynlong ia ka lympung.
