Mumbai, Jymmang:
Ka National Investigation Agency (NIA) ka la poi ha Nagpur ha ka sngi Ba-ar na ka bynta ban pynlong ïa ka jingtoh-kit halor ka jingïoh jingtip ba la don ba Phone bad byrngem ïa u Myntri ka sorkar kmie uba dei khmih ïa ka tnat Transport u Nitin Gadkari, la ïathuh u heh pulit.
Kumba la pynshisha la ong ba ïa kane ka Call la leh da uwei u runar uba la shah rai pynrem ha kaba ïadei bad ka kam pynïap briew, u Jayesh Pujari ïa uba la tip ruh da ka kyrteng kum u Kantha, ïa uba la shahkem na ka patok kaba ha Belagavi, kaba don ha Karnataka, bad u la shah pynngat hapoh ka aiñ UAPA.
U heh jong ka tnat pulit ha Nagpur u la ong ba ka kynhun NIA ka la buh da ka jingmudui ha ka jaka treikam jong ka kynhun ha Bengaluru bad Mumbai ha kaba la hukum ba la dei ban pynlong ïa ka jingtohkit.
Ka kynhun NIA ka la poi ha Nagpur na Mumbai bad sdang ban lum ïa ki kot ki sla bad kiwei pat ki bynta ba kongsan ha kaba ïadei bad ka jingjia, u la ong.
Na ka jingkhmih bniah ba la suba ba ka la don ka jingïatreilang jong ki lehnoh Lashkar-e-Taiba, ka kynhun lehnoh ha Pakistan bad ki nongkyrshan jong ki lehnoh ha kaba ïadei bad kane ka bynta, ka kynhun ka la khmih bniah ha kaba ïadei bad ka jingtohkit, la ong u heh pulit.
Ha ka 14 tarik, Kyllalyngkot, u Pujari u la phah ïa ka khubor byrngem sha ka jaka treikam jong u Gadkari ka Public Relations Office ha Nagpur, ha kaba la dawa ïa ka pisa kaba T. 100 klur bad kam ba u dei u dkhot jong ka kynhun u Dawood Ibrahim, la ïathuh u heh pulit.
Ha katei ka por, u la shah set ha patok ha ka jylla ba marjan ha Karnataka hadien ba u la shahkem bad shah tohkit bniah ha ki pulit halor ka jingdonkti jong u ha ka kam beaiñ.
U la Phone biang ha ka 21 tarik, Lber, ha kaba u la byrngem ban thombor ïa u MP jong ka seng BJP ha Lok Sabha na Nagpur lada um siew ïa ka pisa kaba T. 10 klur sha u, la ïathuh shuh shuh ki pulit.
Hadien kane ki pulit ki la nang pynjur ïa ka jingtohkit bad ki la pynlong ka jingtohkit bniah ïa une u runar.
U Pujari u la shahkem bad shah ïalam sha Nagpur ha ka 28 tarik, Lber na ka patok kaba don ha Belagavi jong ka Karnataka, bad u la shah pynngat ha ka Unlawful Activities (Prevention) Act.
Hadien ba la ïoh hukum na u Myntri ka tnat ki kam pohïing jong ka sorkar kmie, ki heh jong ka kynhun NIA ki la pynlong ïa ka jingtohkit kaba bniah naba u Pujari u la don bynta bad ki lehnoh, kynthup bad u heh jong ka Lashkar-e-Taiba’s South Division u Captain Naseer, la ïathuh shuh shuh u heh pulit.
U Pujari u la shah hikai pyntbit ha kaba ïadei bad ki tiar siat ha North-East, u la bynrap.
