Srinagar, Jymmang:
Ki pulit jong ka Jammu & Kashmir ha ka sngi Ba-ar ha ryngkat ka jingïatreilang bad ki shipai ïada ri ki la ïoh ban kem ïa arngut ki nongïarap jong ki lehnoh ka kynhun Lashkar-e-Taiba (LeT) ha Shopian.
Ki pulit ki la ïoh ban kurup ïa ki tiar beaiñ kiba bun, kiba kynthup ïa u bom IED, ki tiar bad ki kuli ïasiat haba la khmih bniah na ki.
Kine kiba la shahkem ki dei kiba la tip kyrteng kum u Shahid Ahmad Lone uba dei u khun jong u Ab Rashid Lone u nongshong shnong jong ka Chotipora Shopian bad u Waseem Ahmad Ganie uba dei u khun jong u Ab Hamid Ganie u nongshong shnong jong ka Borihalan Shopian.
“Ha ka por ba la pynlong ïa ka jingtohkit ha kaba ïadei bad ka jingujor ejahar kaba No.65/2023 ha ka jaka treikam ki pulit ka Shopian, ki pulit ha ka jingpyntreikam ha ryngkat ki shipai ka tnat Army (44 RR), CRPF (14 Bn) ha ka sngi Ba-ar ki la ïoh ban kem sa arngut ki nongïarap jong ka kynhun ki lehnoh LeT”, la ong ki pulit.
Kumba la ïathuh ki pulit, la ong ba la ïoh ban kurup ïa ki tiar kiba long beaiñ, kiba kynthup ïa ki tiar siat bad ki kuli, kawei ka pistol, u Magazine, 4 song ki kuli, kawei ka Silencer, uwei u bom IED, uwei u Remote Control, 2 tylli ki Battery bad uwei u Magazine thylli jong ka suloi AK 47 na kine kiba la shahkem.
Kumjuh ha ka 2 tarik, Jymmang, ki pulit ha ryngkat ka jingïatreilang bad ki shipai ïada ri ki la ïoh ban kem ïa u nongïarap jong ka kynhun lehnoh LeT, ïa uba la tip kyrteng kum u Tanveer Ahmad Wani uba dei u khun jong u Bashir Ahmad Wani u nongshong shnong jong ka Daramdora Shopian.
Na une uba la shahkem la ïoh ban kurup ïa kiba bun ki tiar kiba long beaiñ, kynthup ki tiar siat, ki kuli, kawei ka suloi AK uwei u Magazine bad 10 song ki kuli bad la buh ruh da ka jingujor ejahar kaba No. 65/2023 ha ka jaka treikam jong ki pulit ka Shopian.
Ka jingtohkit ha kaba ïadei bad kane ka jingjia ka dang ïai bteng haduh ba la thoh ïa ka khubor.
