Tashkent, Jymmang:
Ka long ka jingiaid lynti kaba seisoh na ka bynta ka kynhun iakura jong ki shynrang ka ri ha ka lympung ialehkai ba mynta ka Men’s World Boxing Championship, ha kaba lai ngut ki rangiakura ka ri ba kynthup ia u Deepak Bhoria (51kg), Mohammed Hussamudin (57kg) bad Nishant Dev (71kg) ki lah khur ia ka jingjop na ka bynta ka jingiaknieh rung sha ka rynsan iakhun semifinal. Da katei ka jingjop ki lah pynthikna ruh halade ia ka jinglah ban khur takma na katei ka lympung ialehkai.
Kumta ha kaba iadei bad ka jingjop ka jong ki, nongkhur takma Rnong na ka CWG u Hussamundin u lah hap ban iakhun da kaba tyngeh na ka bynta ban khur shalade ia ki 4-3 jingjop lyngba ka jingrai iaphiahlang jong ki nongbishar ia ka jingialehkai ha kaba utei u rangialehkai u lah khur ia ka jingjop pyrshah ia u nongiakura na Bulgaria u J Diaz Ibanez. Kumjuh ruh ha kawei pat ka jingiakhun quarterfinal, u Deepak u la lah ban pynliem noh ia u Nurzhigit Diushebaev na Kyrgyzstan da 5-0 da kawei ka jingrailang jong ki nongbishar na ka bynta ba un iai pynseisoh shuh shuh ia ka jingiaid lynti ka jong u ha katei ka lympung iakura ha ka kyrdan Flyweight; ka ban sa pynialehkai ruh ha ka Olympic 2024 ha Paris.
Haba phai pat sa sha ka kyrdan iakura 71kg ha katei kajuh rynsan iakhun, sa uwei pat u rangiakura ka ri kata u Nishant Dev u la lah ban khur ia ka jingjop da kaba pynliem noh ia u rangiakura na Cuba u Jorge Cuellar da 5-0. Kumta da katei ka jingjop ka jong u, mynta u lah pynthikna halade ba la kumno kumno un ioh ban rah ia ka takma Rnong na ka lympung. Ka long ruh ka sien kaba nyngkong ia ki rangiakura ka ri ba kin khur ia ki lai tylli ki takma na kawei ka bynta jong katei ka lympung ialehkai.
