Shillong, Jymmang 10:
U nongïalam ka Trinamool Congress (TMC), Dr. Mukul Sangma ha ka Sngi Balang u la kyntait ïa ki khubor ba u la ïakynduh ïa ki nongïalam ka Bharatiya Janata Party (BJP) dang shen ha New Delhi.
U Dr. Sangma u la ong ba kan jyn da la bha ïa ki lad pathai khubor ban kren ïa u ha shuwa ban thoh ïa kaei-kaei ka bym shym la jia.
“Wat hynne ka sngi ka la don ka khubor hynrei hadien ba nga la pule, nga sngewthuh ba ka dei tang kaba shu tharai bad kaba shu mutdur,” la ong utei u nongïalam ka TMC.
U la ong ruh ba ki lad pathai khubor ki dei ban ïohsngew na ka shyntur u trai ha shuwa ban thoh ïa kaba kum kata ka khubor.
U Dr. Sangma u la ong ba kine ki jingthoh ki phah ïa ki khubor jong ka jingbym shai da kaba bynrap ba u don ki daw ban ngeit ba kitei ki khubor ki dei ban don jingïadei bad ka ilekshon ha Sohïong.
Utei u nongïalam ka TMC u la ong ba kitei ki jingthoh ki long tang ban kynriah na ka bynta haba ka don ka jingdonkam ban pynleit jingmut ïa ki mat ki jura kiba kongsan bad kiba tynjuh ïa ki nongshong shnong ka Jylla.
Halor ki jingkam u Myntri Sorkar bad nongïalam ka BJP, Bah A.L. Hek ba ma u lem bad u Sangma ki la ïashong dih sha ban ïakren halor ka jingpynïasoh sha ka BJP, u Dr. Sangma u la ong ba u Bah Hek u la kwah ïakynduh ïa u ha ka 3 tarik u Lber, shi sngi hadien ba la pynbna ïa ka risol ilekshon.
“Ha kata ka step, ngi la ïa dih sha bad ngi la ai khublei iwei-ïa-iwei hynrei u la kyrkieh ban leit sha ka jingïalang jong u. Hynrei u la ong ïa nga kawei…u la ong ba um sngewtynnad haba ïadei bad ka risol jong ka ilekshon,” la ong utei u nongïalam ka TMC.
Ka BJP ka la jop tang na 2 tylli ki konstitwensi ha kane ka ilekshon ba dang shu dep.
Ha katei ka jingïakynduh, u Dr. Sangma u la ong ba ka jingsngewkhia jong u Bah Hek ka long la dang dei ne em ban shah ïa kane ka Sorkar ban bteng hapoh ka jingïalam ka National People’s Party (NPP).
Katkum ka jingïathuh jong u, utei u nongmihkhmat ka BJP u la ong tang kawei, “Sngewbha leh eiei khnang ba kane kajuh ka Sorkar kan ym wan biang ha ka bor sa shisien.”
Ha kawei ka liang, u Dr. Sangma u la kyntait ïa ka jingkam u Bah Hek, ba utei u nongïalam ka seng u la khot ïa u ban pynïasoh sha ka BJP.
U la ong ruh ba ka long ka rukom jong ki seng saiñ pyrthei ban wad ki lad ki lynti bad ka TMC ruh ka leh kumjuh.
“Ngi ruh ngi kwah ba kiwei-kiwei ki MLA kin pynïasoh sha ka seng jong ngi,” la bynrap u Sangma.
U la ong ruh ba ka Jylla ïa mynta ka donkam ïa ka jingïatylli bad ka jingwan lang hajuh jong baroh ki seng saiñ pyrthei.
Ha kajuh ka por, u la kdew ba hadien ka risol jong ka ilekshon ha ka 2 tarik u Lber, ma u lem bad kiwei-kiwei ki seng kiba ïahap jingmut ki la pyrshang ban thaw noh da kawei ka Sorkar, hynrei kane ka la pulom.
U Dr. Sangma u la ong ruh ba ka rai jong u paidbah ka long ban don noh da kawei ka Sorkar ka ban bujli ïa ka MDA, hynrei kaba sngewsih ka long ba kita kiba ïadon bynta lang ha ka jingïalang, suki-suki ki la sdang ban jah rngai.
Na ka liang jong u, u la ong ba ha kine ki sngi ban wan, kin sa don shubun kiei-kiei ki ban jia bad ka TMC kan ïakhun pyrshah ïa ka Sorkar.
Shuh shuh halor ka jingpynïasoh jong ka People Democratic Front (PDF) sha ka NPP, u Dr. Sangma u la ong ba kane baroh ka dei ka jingpyrshang katba lah na ka liang kito kiba ha ka liang synshar ban neh ha ka bor.
“Kito kiba don ha ka liang synshar mynta ki pyrshang ban pyntikna ba kin neh ha ka bor namar ki khuslai lada kim don ha ka bor,” u la ong.
