Shillong, Jymmang 10:
Uwei na ki nongïalap ilekshon uba ki paidbah ka jylla ki shait sngewtynnad ban sngap ha ki rynsan lad pathai, kata Bah Amazing Kurbah, u la pynpaw ba ym dei ba u kynthoh; hynrei ka dei ka jingpynphai nia ïa ka jingkynthoh ki nongïalam ka NPP haba ki la ïeng ha rynsan ïalap ilekshon.
U Bah Amazing u dei na ka shnong Khimurah kaba hap ha Lawshlem Polling Station kaba hap ha ka thaiñ Rangshken, Sohïong constituency, East Khasi Hills District. U dei ruh u nongkyrshan ba shit rhem jong u kyrtong ka UDP, u Bah Synshar Lyngdoh ha kane ka ilekshon kaba long mynta u snem.
Hadien ba ki paidbah ka Sohïong konstitwensi ki la dep thep ïa la ka vote ha ki polling station bapher bapher ha ka 4 baje janmiet jong ka 10 tarik Jymmang 2023, U Nongsaiñ Hima u la ïoh ban leit wad kyrpang ïa u Bah Amazing Kurbah shaduh ka Lawshlem Polling Station ban ïoh ïakren kyrpang bad utei u rangbah halor ka sap kaba u lah ban kren ha ka jingïalang paidbah ban pynsngewtynnad ïa ki nongsngap kiba peit ha ‘youtube’.
Kum ban shu pynkynmaw, u Bah Amazing u dei u nongkyrshan jong u Bah Samlin Malngiang ha u snem 2018, hynrei naduh ba u la rung sha ka seng NPP, u Bah Amazing ruh u la rung noh sha ka seng UDP. Ka sien nyngkong ba u ïoh ban kren ha ka jingïalang paidbah ka dei ha Madan Kor bad Dewlieh kaba u la ïoh ban kren kham bun ka por kaba la pynlong ïa ki paidbah ba kin sdang ban sngewtynnad haba ki peit ïa u ha ‘youtube’.
U Bah Amazing u la ong ka jingïoh buit ban kren jingïalang paidbah ka dei namar u don ka mynsiem bym dei ban tieng ïano ïano kum u rangbah Khasi, hynrei kaba tieng ka long beit tang ïa U Blei.
“Ka jingsdang jong nga ban ïalap ilekshon ka long ban pynshai ïa kito kiwei ki seng saiñ pyrthei kiba kynthoh, hynrei kam dei ban artatien haba kren halor ka nongrim” u la ong.
Nalor kata, u la ong ka jingpynsngewtynnad ïa ki paidbah namar u kren ban pynrkhie teng teng u kren ban pynïap nia ïa kiba kynthoh.
Nangta u la pynshai ruh ba ka jingshad ka jong u ha ka jingïalang UDP kaba khatduh ha Sohïong ka long ban pynsngewtynnad ïa ki paidbah namar mynshuwa u ju ïashim bynta ban ïakob shad ha ki rynsan bapher bapher.
Shuh shuh u la ïathuh haba u leit sha jaka ïew ki paidbah ki ju kren ïa u naduh ba u la paw ha ‘youtube’.
