Shillong, Jymmang 10:
Ka lympung ïalehkai Meghalaya State League 2023 kaba lai kan sdang ha ka sngi Thohdieng ha Kiang Nangbah Stadium kaba ha Jowai.
Ha kane ka sngi sdang, ka Niaw Wasa United kan ïakhun nyngkong pyrshah ïa ka kynhun kaba wan ba-ar ha ka MSL 2019 ka Rangdajied United FC na ka bynta ka Jowai Zone ha ka por 3 baje janmiet.
Ha kane ka lympung ïalehkai, u Myntri ka tnat Ïalehkai ka Sorkar Jylla, Bah Shakliar Warjri, un long kum u kongsan bad u MLA ka Jowai, Bah Wailadmiki Shylla kum u symbud kongsan.
Ki bor pynïaid ki la pyntip ruh ba ïa kane ka lympung lah ban kylla khyndiat na ka bynta ka Mawkyrwat Zone na ka daw ba ka Shillong Lajong FC ka dang don ha ka jingïakhun ïa ka wat ba khatduh jong ka lympung ïalehkai Second Division League ba la pynïaid da ka All India Football Federation.
Ha kane ka lympung ïalehkai mynta u snem ki la don haduh 25 tylli ki klob bad la phiah ha ki saw tylli ki group; kita ka Tura (madan Chandmari), Mawkyrwat (madan MDSA), Shillong (madan Third Ground, Polo) bad ha Jowai (Kiang Nangbah Stadium).
Ïa ki jingïakhun semi final yn pynlong ha ïing bad shabar (ar kylla), bad ïa ka final yn pynlong ha ka nongbah Shillong.
Ki kynhun ki ban ïalehkai ha ka Shillong Zone ki long ka Mawlai SC, Jyntru, Seng Samla Laitryngew, Umkseh SC, Langsning SC bad ka Umrit SC. Ha ka Jowai Zone ki long ka Niaw Wasa United, Rymbai Iawpynsing SC, Mulait United FC, Sein Pynbhalang SC, Rangdajied United FC, Ladthadlaboh SC bad ka Youth Club Pdengkarong. Ha ka Mawkyrwat Zone ki long ka Pyndengrei SCSC, Mawten SC, Riangdo YSCA, Seven United SCCC, Lumdiengngan SC bad ka Shillong Lajong FC. Ha ka Tura Zone ki long ka Chipakkore FC, Warima YC, Wasa FC, Atong Matgrik FC, Khliehmawlieh YC bad ka Selsella Sports Association.
