Yn ïaknieh nam lahduh ka Laban Bengali & All Saint’s ha ka U-18 Inter School

Shillong, Jymmang 10:

Ka Laban Bengali Boy’s bad ka All Saint’s ki la jam sha ka final ha ka lympung ïalehkai Under-18 Inter School League 2022-23 ba la pynïaid da ka Shillong Cricket Association.

       Ha kane ka jingïakhun semi final kaba la long ha ka sngi Balang, ka All Saint’s ka la pynliem noh ïa ka St Anthony’s da 6 wiket. Ka St. Anthony’s hadien ba jop ïa kynting pisa, ka la kam trai shwa ban tied nyngkong bad ka la kamai 104 run na bynta ban shah pynhap 6 wiket ha ki 15 over. U Gaurav u la tied 20 run na ki 25 bol bad u Santosh Paul u la ïoh 12 run na ki 11 bol. Katba u Aditya bad u Manthan Dey ki la khur mar 2 wiket na ka bynta ka All Saint’s.

       Haba wan beh ïa ka thong, ka All Saint’s ka la kynjoh sha ka thong da kaba ïoh 105 run bad shah pynhap 5 wiket ha ki 13.5 over. U Manthan Dey u la tied 34 run na ki 32 bol bad u Saptarshi Bhattacharjee u la ïoh 26 run na ki 20 bol. Katba u Mukrang Kro u la khur 2 wiket bad 1 wiket da u M.Reicken Singh na ka bynta ka St Anthony’s. Ïa ka nam ‘Man of the Match’ la khur da u Manthan Dey.

       Haba phai sha kawei pat ka jingïakhun kaba ar, ka Laban Bengali Boy’s ka la pynliem noh ïa ka R.B Anupchand da 87 run. Ka Laban Bengali kaba la jop ïa kynting pisa ka la shimti shwa ban tied nyngkong ha kaba ka la kamai 130 run bad shah pynhap 4 wiket ha ki 15 over. U Dipankar Barua u la ïoh ban khyrwit ïa ka shiteng spah da kaba ïoh 76 run na ki 42 bol bad u Chandan u la ïoh 16 run na ki 11 bol. Katba u Deep Raj u la khur 2 wiket bad 1 wiket da u Rohan na ka bynta ka R.B Anupchand.

       Haba wan beh ïa ka thong ba la buh da ka liang pyrshah, ki nongtied ka R.B Anupchand ki la shah pynhap baroh ki wiket na ka bynta ban kamai tang 44 run ha ki 7.5 over. U Aditya Singh u la tied 11 run na ki 8 bol bad u Sudhir Kr Ray u la ïoh 10 run na ki 7 bol. Katba u Rohan u la khur 5 wiket bad 2 wiket da u Chandan. Ïa ka nam ‘Man of the Match’ la khur da u Rohan.

       Lyngba kane ka nam jop ka Laban Bengali Boy’s kan pynkhreh ban ïaknieh ïa ka nam lahduh pyrshah ïa ka All Saint’s ha ka Sngi Saitjaiñ ha madan Polo.