Beijing, Jymmang:
U nongialam ba ha khliehduh jong ka Chinese Badminton Association (BAC) u Zhang Jun dang shen u la pynpaw ba kawei ka thong ba ka kynhun ialehkai Badminton jong ka ri China ha ka lympung ialehkai ka ban sa wan ka Sudirman Cup, ka long ba katei ka kynhun sa shisien biang pat kan ialeh na ka bynta ban iada bad ban iakhun tyngeh na ka bynta ban iai bat halade ia ka trophy jingjop ba katei ka kynhun ka lah dep ban khur na ka lympung.
Kumta ha kaba iadei bad katei ka lympung ialehkai ka ban sa long mynta u snem, kin sa don 16 tylli ki kynhun ialehkai ki ban ia aireng ha ka bad ka China ka lah shah pyniakab mynta ha ka Group A ryngkatlang bad ka kynhun ialehkai na Denmark, Singapore bad Egypt.
Shuh shuh ruh na ka liang jong u Zhang u kyrmen skhem ruh ba ka jingshah pyniakab ka kynhun ialehkai na China ha katei ka group ka long kaba bha shibun eh, hynrei ki nong-ialehkai jong ka ki dei ruh ban pynkhreh bha ialade na ka bynta ki jingiakhun jong ki ha ka rynsan Knock-out.
Kata ka kynhun ialehkai jong katei ka ri kaba long ka kynhun jingjop bakhraw ha ka khana-pateng jong ka Sudirman Cup, ka lah bat ia ka kyrdan ba hajrong lah khat-ar sien ha ki 17 bynta ba lah leit noh jong ka lympung ialehkai bad ka lympung ialehkai mynta u snem kan long ha Suzhou bad katei ka ri kan iakhun tyngeh na ka bynta ban dang iai bat biang halade ia ka nam kum ka lahduh jong ka lympung.
Na ka liang jong u Zhang u lah pynpaw ruh ba ka kynhun ialehkai na China ia mynta ka don hapoh ki ar jingeh kiba ka iakynduh na ka bynta ka jingpynlong ia ka lympung baroh kawei bad ka jingiakhun jong ka ban iada sa shisien ia ka nam jop, hynrei ki nongialehkai ki dei ban don ia kata ka atiar jong ka jinglah jong ki ban ialehkai bha naduh kaba sdang haduh ka sngi pyhap pyrda ia ka lympung ha ryngkat bad shibun tylli ki jingjop ba kin khur.
Ka kynhun ialehkai jong katei ka ri na ka bynta katei ka lympung ialehkai ka pynieng mynta ha u lain ia ki nongialehkai kiba paw bad ba khlain kynthup naduh u lahduh Olympic u Chen Yufei, Shi Yuqi bad ka kyrdan iakhun ba mar arngut; u Zheng Siwei/Huang Yaqiong bad Chen Qingchen/Jia Yifan. U Zhang u pynpaw ia ka jingsngewdiaw ka jong u ha kaba iadei bad ka kynhun ialehkai jong ki kynthei, ha kaba ka ju long kaba nyngkong ha ka pyrthei na ka por sha ka por, hynrei ha u snem ba lah dep ha ka Uber Cup katei ka kynhun ka lah duh noh ha ka ban khur ia ki dor-thong.
Ka khubor ka iathuh ruh ba u soh u ban sa mih ha kaba kut jong katei ka lympung ialehkai un lah ruh ban saindur pura na ka bynta ka jingshah jied jong ki kynhun ialehkai na ka bynta ka Olympic 2024 ha Paris. Ki nongialehkai ba dang kham khynnah ha katei ka kynhun ialehkai ki long baroh kiba biang eh, hynrei ki long pat kiba dang duna ha ka jingnang jingtbit ka jong ki.
Kumta kin ioh mynta shibun shuh shuh ki lad ki lynti ha katei ka lympung ialehkai ba kin ioh ialehkai bha bad ba kin ioh ruh ban rung sha ka jingiakhun na ka bynta ka jingshah jied sha katei ka lympung ialehkai Olympic jong u snem ban wan.
