Shillong, Jymmang 10:
Ka Sorkar Jylla ka la mang haduh T.415.93 klur na ka bynta ban pyntreikam ïa palat 17 tylli ki projek kiba thmu ban kyntiew ïa ka kam jngohkai pyrthei hapoh ka jylla Meghalaya.
U Myntri ka tnat ki Kam Jngohkai ka sorkar jylla, u Bah Paul Lyngdoh haba pyntip halor kane, u la ïathuh ba ki la don haduh 17 tylli ki projek kiba hapoh ka Meghalaya Eco Tourism Infrastructure Development Project ba la pynkhreh ban pynshna bad ki don ruh napdeng kine kiba la sdang ban pyntrei ïa ka kam.
Haba kren sha ki lad pathai khubor ha ka sngi Balang, u Bah Paul u la ïathuh ba ka pisa kaba la mang na ka bynta kine ki projek kiba la pynkhreh ka la kot sha ka T.415.93 klur.
U la ong ruh ba la khot ‘tender’ mynta na ka bynta ka Rural Hospitality Complex ha ka shnong Kongthong ka ban sa kot sha ka T.7.45 klur, katba kiwei pat ki projek ha kylleng ka jylla kiba kynthup ïa ka Shillong Peak Ropeway yn sdang ha u Naiwieng mynta u snem bad kiwei kiwei ki projek kiba ka sorkar lyngba ka tnat jngohkai ka la mang.
Nangta u la ong ruh ba ïa kine ki projek bapher bapher yn sa khot ‘tender’ noh ha ki ar ne lai bnai ban sa wan bad la mang kumba T.415.93 klur ban shna ïa ki projek bapher bapher hapoh ka jylla.
