Shillong, Jymmang 11:
Ka Hynñiewtrep Integrated Territorial Organisation (HITO) ha ka Sngi Palei ka la leit ban aiti da ka dorkhas ha u Symbud Myntri Rangbah ka jylla, u Bah Sniawbhalang Dhar ban dawa ba ka sorkar ka dei ban shna noh da ka aiñ lane ka ‘Policy’ ban pynïoh da ka skhim kaba dei ka bynta jong ka Education Scholarship khnang ba ki khynnah kiba wan na ki longïing longsem kiba duna ha ka ïoh ka kot bad kiba don ïa ka jingnang jingstad, hynrei ki bym kot bor shuh ban leit pule ïa ki jingpule kiba kham shajrong ba kin lah ban bteng ïa ka jingpule jong ki lyngba ka jingïarap jong ka sorkar.
Haba kren sha ki lad pathai khubor hadien ka jingwan ïakynduh ïa u Bah Sniawbhalang, u President ka HITO, u Bah Donbok Dkhar u la ong ba lada ka sorkar kam pat don ïa ka ‘Policy’, ka dei ban ai jingïarap ïa ki khynnah skul kiba ‘pass’ bha ha ka jingpule bad kiba duna ha ka ïoh ka kot na ka bhah jong ka Chief Minister’s Relief Fund ne kino kino ki skhim jong ka sorkar jylla.
U Bah Donbok u la ong ba hadien ba ka Meghalaya Board of School Education (MBoSE) ka la pynmih ïa ka risol HSSLC ki la don bun ki khynnah kiba shem jynjar ban bteng ïa ka jingpule. Kumta na ka liang ka seng ka la kyrpad ïa utei u Symbud Myntri Rangbah ba un pynsngew ïa kane sha u Myntri Rangbah ka jylla, u Conrad K Sangma bad na ka liang utei u Symbud Myntri Rangbah u la ong ruh ba un sa rah ïa kane ka bynta ban ïakren.
Nangta u Bah Donbok u la ong ruh ba ha katei ka dorkhas la pynsngew ba ki don ki khynnah kiba wan na ki jaka nongkyndong kiba jngai na sor bad kim don ïa ki jaka sah kiba biang lane ki hostel, katba ïa kiwei ka Karbi Hostel kaba don hajan ka skul Pine Mount ka sorkar ka lah ban ai jaka sah. Nalor kata, u la ong ba lada ka sorkar ka lah ban ai hostel ïa ki nongmihkhmat bad ka ai jaka tang ha ka dor T.1 ïa ki ophisar IAS, te kumno pat kam lah ban ïarap ïa ki samla kiba wan na ki longïing kiba duk.
“Ngi sngew ba na ka liang ka jong ngi, lada ïa kiwei kiba wan nabar, ka sorkar ka lah ban ai bad ka bha mynsiem eh, katba ïa ki jong la jong pat, ka ïeh ïa ki ba kin sakma bad ïap,” la ong u Bah Donbok.
