Shillong, Jymmang 11:
U Myntri Rangbah barim ka jylla, u Dr Mukul Sangma bad uba dei ruh u MLA ka AITC kaba don ha ka Liang Pyrshah, ha ka Sngi Palei u la ong ba katkum ki jingkynthoh ïaroh sorkar ba la paw, ka paw ba u Bah Vincent H Pala uba dei u nongïalam ka Congress u kwah ban pynïasoh ne rung noh sha ka sem National Peoples’ Party (NPP).
Haba kren sha ki katto katne ki nongthoh khubor, u Dr Mukul u la kynnoh ba ka jingkren ïaroh jong u nongïalam ka Congress u Bah Vincent H Pala ïa ka Sorkar kaba la lah ban shimkhia halor ka jingeh kaba ïadei bad ka ‘high level’ ka pynpaw ba u kwah ban rung noh sha ka National People’s Party (NPP).
Lah ban pynkynmaw ba dang shen, u Bah Vincent H Pala, uba dei ruh u MP ka Shillong u la ïaroh ïa u Symbud Myntri Rangbah ka jylla u Bah Prestone Tynsong, uba khmih ruh ïa ka tnat Kam Pohïing ba u la lah ban pynkut ïa ki ‘high level’; kiba la kynnoh ba ki donkti ha ka kam shalan dewïong beaiñ hapoh ka jylla.
“Nga ai ka jingïaroh ïa u Bah Prestone na ka bynta ka jinglah ka jong u ban pynkylla ïa ka kyrteng ‘high level’ sha ka ‘zero level’ kumba ka long mynta. Naduh ba la shimti u Bah Prestone ïa ka tnat Kam Pohïing, la shem ba kam don shuh kata ka ‘high level’,” la ong u Bah Pala.
Haba pan jingkynthoh halor kane ka bynta, u Dr Mukul u la ong, “Kine ki dei ki nongmihkhmat ne ki nongïalam saiñ pyrthei ki bym don shuh ka jinglehraiñ. Ki ïohnong na kine baroh ki kam beaiñ da kaba pynpaw sha ki paidbah ba ka biang ban ong ba u ketli u dei uba ïong bad ruh ba u ketli pat u ong ba u khiew uba ïong.
“Kaei kaba u Bah Pala u la kren ha shwa jong ka ilekshon? Bad mynta pat u la lah ban thaw ïa ka rukom long kaba pher, imat u la kwah ban rung noh sha ka NPP. Imat ka lah ruh ban dei na kane ka daw, ba u la ai ka jingkynthoh ïaroh ïa ka Sorkar tang na ka bynta ban plie kdar ïa ka lynti kaba kylluid. Ngam don ïa kano kano ka daw ne ka jingartatien halor kata ka jingthmu, shu ap beit ïa kane kaba nga la ong,” la ong u Dr Mukul.
