Mawkyrwat, Jymmang 11:
Ar tylli ki ïing kiba dei jong ka kmie bad ka khun, kata ka ïing jong ka Kong Kity Thongni bad ka Kong Olinda Thongni ha ka janmiet jong ka 10 tarik u Jymmang 2023, ki la shah bam duh ha ka ding bad 4 ngut ki briew ki la mynsaw ha katei ka jingjia.
Katkum ki tyllong khubor ba la ïoh lum la ïathuh ba katei ka jingjia ka la jia ha ïew Rangblang Pambriew ha ka por kumba 7 baje eiei janmiet ha kaba kitei ki ïing kyndit-kyndit ki la kem ding kynsan.
Shuh shuh ki tyllong khubor ki ïathuh ruh ba ha katei ka jingjia ka la don ruh ka jingbthei ha kaba ki paidbah ki la lynñiar bad phet ruma bad la suba ba ka jingbthei ka lah ban dei na ka fridge (refrigerator).
Ha katei ka jingjia 4 ngut ki briew ki la mynsaw malu-mala kynthup ïa iwei i khyllung. Kine kiba la mynsaw ki long ka Kong Shandra Thongni, Ailinda Thongni, Olinda Thongni lem bad i khyllung.
Ïa ka daw ka jingpluh jong kitei ki ïing ym shym la lah ban tip bad la suba ba lah ban dei na ka jingthut jong ka bording ilektri. Haba ïakren bad ki trai ïing ki la ïathuh ba ki jingjulor baroh ka la kot sha ka phew lak tyngka.
