Guwahati, Jymmang:
U Myntri Rangbah jong ka jylla Assam, u Himanta Biswa Sarma ha ki khyndiat sngi kiba la leit noh u la pyntip ba ka sorkar jylla ka la shim ïa ki lad ki lynti kiba kongsan na ka bynta ki sienjam ban weng noh ïa ka jingpyntrei kam ïa ka Armed Forces Special Powers Act (AFSPA) na ka jylla.
Ïa katei, u Myntri Rangbah u la pyntip ha ka jingïalang bad ki lad pathai khubor kaba la pynlong ha ka 9 tarik mynta u bnai ha Guwahati. U la ïathuh ba na ka liang ka sorkar jylla ka don ïa ka thong ban lah weng pura ïa ka jingpyntreikam ïa ka aiñ AFSPA na ka jylla hashwa ban kut une u snem u ba mynta.
Ha ka jingïalang bad ki lad pathai khuboru la pyntip shuh shuh ba na ka liang ka sorkar jylla ka la shim da ki sienjam kiba kyrpang eh ban tehlakam ïa ka shong suk shong saiñ ha 5 tylli ki distrik jong ka jylla kiba dang shah pynhap ha ki kyrdan kum ki thaiñ kiba dang shong syier.
Dang ha ki khyndiat bnai kiba la leit noh na ka liang u Myntri Korbar Ri jong ka Sorkar Pdeng – Amit Shah u la pynbna ïa ka jingweng pyntreikam ïa ka AFSPA na ki katto katne ki distrik jong ka jylla Assam, Nagaland bad Manipur.
Ïa katei ka rai, ka Tnat Korbar Ri ka la pynbna hadien ba ki kynhun treikam bapher bapher na ka Thaiñ Shatei Lam Mihngi ki la pynlong da ka jingïakhih ban weng noh ïa ka AFSPA na baroh ki jylla jong ka thaiñ Shatei Lam Mihngi.
Na ka liang u Amit Shah u la pynbna ruh ba ïa ka aiñ AFSPA la rai ban weng pyntreikam noh na ki katto katne ki thaiñ hadien ka jingsdang wan phai jong ka suk ka saiñ bad kumjuh ruh hadien ka jingwan ïashim bynta jong ki katto katne ki seng kieng atiar na ka thaiñ shatei lam mihngi ban soi ïa ka soskular sngewthuh jingmut.
